Бары бииргэ
2023 сыл муус устар 3 күнүгэр РФ Президенэ Владимир Путин ыйааҕынан «Аҕа дойдуну көмүскээччилэр» Судаарыстыбаннай пуонда тэриллибитэ. Пуонда байыаннай сулууспаттан төннүбүт уонна анал байыаннай дьайыыга өлбүттээх дьиэ кэргэннэри өйүүр соруктаах. Биһиги өрөспүүбүлүкэбитигэр бу пуонда филиала биир бастакынан арыллыбыта, 2023 сыл бэс ыйын 1 күнүттэн Саха сирин бары улуустарыгар салааланан үлэлиир.
Хаҥалас улууһугар «Аҕа дойдуну көмүскээччилэр» пуонда филиалын социальнай координатора Екатерина Перевалова буолар. Кини Анал байыаннай дьайыы кыттыылаахтарын, бэтэрээннэр кыһалҕаларын быһаарыыга чопчу үлэлэһэр.
— Хаҥаластааҕы филиал үлэлиэҕиттэн 1300 тахса араас хабааннаах ыйытык киирэн көрүлүннэ, 96 % быһаарылынна. Пуондабыт байыаннай дьайыы кыттыылаахтарыгар көрүллэр өйөбүл миэрэлэри туһаналларыгар, ол иһигэр медицинскэй, социальнай реабилитацияны ааһалларыгар, эминэн-томунан хааччыллалларыгар, психологическай көмөнү туһаналларыгар, санаторнай-курортнай сынньалаҥҥа баралларыгар көмөлөһөр. Ону сэргэ, бэтэрээннэр үөрэх ааһан үлэ булалларыгар тирэх буолабыт. Онон улуустааҕы Дьарыктаах буолуу киинин, Дьиэ кэргэҥҥэ уонна ыччакка психологическай өйөбүл Киинин кытта ыкса үлэлэһэбит. Бииргэ нэһилиэктэринэн сылдьаммыт көрсүһүүлэри тэрийэбит, консультация биэрэбит. Үлэбит өссө биир сүрүн хайысхата – анал байыаннай дьайыыга кытта сылдьан өлбүт буойуттар ааттарын үйэтитии буолар, — диэн социальнай координатор Екатерина Перевалова пуонда үлэтин сүрүн хайысхатын иһитиннэрдэ.
Биллэрин курдук, күн бүгүн Саха сиригэр байыаннай эпэрээссийэҕэ кыттар, кыттыбыт дьоҥҥо уонна өлбүт буойуннар дьиэ кэргэннэригэр араас өйөбүл миэрэлэр оҥоһуллаллар. Ол курдук, биир кэмнээх материальнай көмө, дьиэлэрин хомунаалынай төлөбүрүгэр, хапытаалынай өрөмүөн усунуоһугар чэпчэтии, дьиэлэригэр гаас ситимин тардыыга көмө, үрдүк, орто үөрэх кыһаларыгар үөрэнэр оҕолоругар стипендия, төрөппүттэр санаторнай-курортнай эмтэниини баралларыгар чэпчэтии, босхо юридическай көмө, кыаммат ыалларга социальнай хантыраак баттаһыы уо.д.а. өҥө көрүллэр. Улахан болҕомто байыаннай дьайыыттан кэлбит буойуттар социальнай адаптацияны ааһалларыгар ууруллар.
— Биһиги пуондабыт нөҥүө бэтэрээннэр эбии үөрэхтээһин, переподготовка ааһаннар үлэ миэстэтэ булуохтарын сөп. Соторутааҕыта икки бэтэрээммит бэйэ дьыалатын арыналларыгар субсидия ыллылар. Өссө биир үтүө холобурунан Покровскай олохтооҕо, Анал байыаннайэпэрээссийэ бэтэрээнэ Иван Самсонов буолар. Кинимобилизация иннинэ «Хотой» олимпийскай резервэ өрөспүүбүлүкэтээҕи спортоскуолатыгар тхэквандо тириэньэринэн үлэлээбитэ. Демобилизация кэнниттэн хос бу үлэтигэр төннүбүтэ. Ааспыт сыл сайыныгар Иван «Основы безопасности и защиты Родины: теория и методика преподавания в общеобразовательной организации» бырагырааманан босхо кууруска үөрэнэн «Учитель основ безопасности и защиты Родины» идэни баһылаата, диплом ылла. Онон билигин кэнчээри ыччаты патриотическай тыыҥҥа иитиигэ бэйэтин тус кылаатын киллэрэ сылдьар. Биһиги бэтэрээннэрбит оскуолаларга Эр санааланыы уруоктарын ыыталлар, араас тэрээһиннэргэ судьуйалыыллар. Уопсайынан, бу хайысхаҕа култуура уонна үөрэх тэрилтэлэрин кытта ыкса үлэлэһэбит. Бу бэрт сотору, муус устар 4-5 күннэригэр, Иван Самсонов Покровскайга байыаннай дьайыы бэтэрээннэригэр уонна анал байыаннай дьайыы кыттыылаахтарыгар анаммыт II Өрөспүүбүлүкэтээҕи тхэквандоҕа турнир тэрийээри сылдьар. Бу турнир спортивнай тэрээһин эрэ буолбакка, бэтэрээннэри түмэн, кинилэр дьиэ кэргэттэрин икки ардыларыгар сибээс олохтуурга, ыччаты түмүүгэ туһуланар. Биллэн турар, биһиги «Аҕа дойдуну көмүскээччилэр» Судаарыстыбаннай пуондабыт бу курдук бэтэрээннэрбит көҕүлээһиннэрин, саҕалааһыннарын өйүүр эрэ, — диэн Екатерина Ивановна пуонда улуустааҕы филиалын үтүө уопутун үллэһиннэ.
Санатан эттэххэ, социальнай координатор улуус дьаһалатыгар (Покровскай куорат, Орджоникидзе уул. 26)үлэлиир, ким кыһалҕалаах, ыйытыылаах хаһан баҕарар кэлэн билсиэххитин сөп.
Ольга Гермогенова.
Хаартыскалары социальнай координатор Екатерина Перевалова тиксэрдэ.