Спорт
28-с төгүлүн ыытыллыбыт Петр Алексеев аатынан өрөспүүбүлүкэтээҕи хапсаҕайга чемпионакка барыта 11 ыйааһыҥҥа 294 бөҕөс күрэхтэстэ. Чемпионакка ”Манчаары оонньууларыгар” хапсаҕайга эр дьоҥҥо 3, бэтэрээннэргэ 4 путевка оонньонно. Биһиги улууспут хамаандата — Дмитрий Эспек, Максим Толмачев, Даниил Иванов, Илья Тимофеев, Прокопий Петров, Егор Рожин, Степан Гаврильев сэттэ путевканы ыллылар.
Эр дьоҥҥо 60 кг ыйааһыҥҥа Илья Тимофеев уонна бэтэрээннэргэ 90 кг үөһэ Степан Гаврильев үһүс миэстэлэри ылары ситистилэр. Бэтэрээннэргэ 80 кг ыйааһыҥҥа Прокопий Петров иккис миэстэни ылан, чахчы кыахтааҕын көрдөрдө, 90 кг Егор Рожин бастакы миэстэҕэ таҕыста.
Бэтэрээннэргэ муҥутуур кыайыылааҕынан Прокопий Петров буолла, хапсаҕайга ким халбархай хамсаныылаах, короннай быраҕыылаах, түргэн, хапсаҕай туттуулаах, сылбырҕа-сымса, сытыы киириилээх-тахсыылаах наар ол кыайыылаах буолар.
Тустууктары сиһилии сырдатан, сылларынан кыайыыларын билиһиннэриэм. Хапсаҕайга Петр Алексеев аатынан СӨ чемпионатын абсолютнай күрэҕин кыайыылаахтара: Васильев Максим (Ньурба) — 1997, Никифоров Петр (Чурапчы) – 1998, Андреев Анатолий (Томпо) – 1999, Табунанов Петр (Таатта) – 2000, Тихонов Михаил (Мэҥэ Хаҥалас) – 2001, Семенов Владимир (Үөһээ Бүлүү) – 2002, Афанасьев Василий (Ньурба) – 2003, Стручков Василий (Абый) – 2004, Иванов Валерий (Үөһээ Бүлүү) – 2005, Брызгалов Александр (Мэҥэ Хаҥалас) – 2006, Петров Прокопий (Хаҥалас) – 2007, Рожин Николай (Үөһээ Дьааҥы) – 2008, Афанасьев Василий (Ньурба) – 2009, Рожин Егор (Үөһээ Дьааҥы) – 2010, Чукров Николай (Орто Халыма) – 2011, Чукров Николай (Дьокуускай)– 2012, Семен Семенов (Уус Алдан) – 2014, Платон Саввинов (Үөһээ Бүлүү) – 2015, Семенов Семен (Уус Алдан) – 2016, Увар Тимофеев (Үөһээ Бүлүү) – 2017, Николай Николаев (Бүлүү)– 2018, Евгений Алексеев (Уус Алдан) – 2019-21, Сергей Семенов (Нам) – 2022.
Василий Можуков, СӨ спордун бэтэрээнэ, Покровскай к.