Спорт
Уус Алдан Бороҕонугар Н. Н. Тарскай аатынан Спорт дыбарыаһыгар муус устар 12-13 күннэригэр төрүт оҕунан ытыыга “Байанай бэлэҕэ” көрүҥҥэ “Хоро Бэргэн-2025 ”күрэхтэһии ыытылынна.
Күрэхтэһии өрөпүүбүлүкэ араас муннугуттан 300-чэкэ охчуту түмтэ. Хаҥалас улууһун хамаандата 14 охчуттаах үрдүк таһымнаахтык кыттан иккис миэстэлэнэн кэллилэр. Хаҥалас хамаандатын састаабыгар аҕа баһылык солбуйааччыта Юрий Никифоров, Римма Макарова, Владислав Ушницкай, Эльвира Кулачикова, Алексей Осипов киирэннэр сүрдээх тыҥааһыннаах киирсиигэ үрүҥ көмүс мэтээл үрдүк аатын сүктүлэр.
Дьахталлар бөлөхтөрүгэр Эльвира Кулачикова 72 очкуолаах үһүс миэстэлэннэ. Эр дьон бэтэрээннэригэр (1970-1954 сс. төрүөх) бастаабыт Виктор Елисеев (Үөһээ Бүлүү) 66 очукуолаах. Биһиги охчуппут очукуота 66 тэҥнэһэн тахсар Владислав Ушницкай пьедестал иккис үктэлигэр турар. Хамаанда түмүгүнэн 1 миэстэ Таатта улууһа (34 очукуо) буолла, 2 миэстэни Хаҥалас улууһа (32 очукуо) ылла уонна 3 миэстэҕэ Бүлүү хамаандта (30 очукуо) тигистэ.
Кыһыҥҥы кэмҥэ биир улахан эппиэттээх күрэхтэһии этэҥҥэ түмүктэммитинэн эҕэрдэлиибин уонна улуус хамаандатыгар инникитин да элбэх ситиһиилэри баҕарабын.
Василий МОЖУКОВ, СӨ спордун бэтэрээнэ, Покровскай к.