П.И.Шадрин аатынан Өктөм орто оскуолатыгар «Ийэ дойдуга бэриниилээх буолуоҕуҥ!» диэн ааттаах кылаастар икки ардыларыгар хор күрэҕэ буолан ааста. Бастакы кылаастан саҕалаан үрдүкү кылаастарга диэри барыта 15 кылаас, 150 оҕо кыттыыны ылла. Дьүүллүүр сүбэҕэ оскуола дириэктэрэ, РФ үөрэхтээһинин бочуоттаах үлэһитэ Калиста Афанасьева, оскуола бибилэтиэкэрэ, СӨ үөрэхтээһинин туйгуна Галина Гаврильева, А.С.Данилова аатынан “Барҕарыы” Култуура киинин дириэктэрэ Федора Фомина үлэлээтилэр.
Хас биирдии кылаас кыаҕын, ыллыыр таһымын учуоттаан, сөптөөх репертуар талыллыбыта – бу улахан ситиһии буолар. Манна барытыгар музыка учуутала, СӨ үөрэҕириитин туйгуна, РФ үөрэхтээһинин бочуоттаах үлэһитэ Татьяна Давыдова кыһаллан, хас биирдии кылааһы дьарыктаан, элбэх үлэни көрсүбүтүн бэлиэтиир тоҕоостоох. Ону таһынан, кылаас салайааччылара оҕолору, төрөппүттэри сомоҕолоон, таҥас-сап тиктэн, ырыа ис хоһоонугар сөп түбэһэр малы-салы туттан киэргэппиттэрэ олус табыгастаах көстүүнү көрдөрдө.
Оҕолору патриот тыыныгар иитэр улахан суолталаах көрүҥүнэн хор буолар. Манна бэлэмнэнэ сылдьан оҕолор ырыа хайдах айыллыбытын, хайдах ыллыахтаахтарын, туох таҥаһы кэтиэхтээхтэрин, ырыа тылын дууһаларыгар киллэрэн үөрэтиэхтээхтэрин, ырыа уобараһын хайдах тиэрдиэхтээхтэрин билсэллэр. Кылаас бүттүүн биир турукка киирэн, сомоҕолоһон, ыллаан ньиргитэрэ – бу барыта оҕо ис кыаҕын арыйарга, төрөөбүт дойдутунан киэн туттарга, өлбүт буойуттарга сүгүрүйэргэ үөрэтэр, иитэр.
Бииртэн биир урукку да, аныгы да ырыалар киһи сүргэтин көтөҕөллөр, ураты турукка киллэрэллэр эбит. Киһи бу оҕолор ыллыылларын истэ олорон көлүөнэ ситимэ быстыбатын, ону салҕааччынан учууталлар буолалларынан киэн туттаҕын.
Бу күрэх Өктөм орто оскуолатын салалтата, учууталлара, төрөппүттэрэ оҕолору Ийэ дойдуга бэриниилээх буоларга үөрэтэллэрин итэҕэтиилээхтик көрдөрдө.
Федора Фомина, Өктөм с.