Бүгүн Г. В. Ксенофонтов аатынан Кыраайы үөрэтэр түмэлгэ фронтовик-суруйааччы, суруналыыс, ССРС суруйааччыларын сойууһун 1939 сыллаахтан чилиэнэ, Саха АССР култууратын үтүөлээх үлэһитэ, Кыһыл Сулус уордьан, үгүс бойобуой мэтээл кавалердара, Орджоникидзевскай (билиҥҥитэ Хаҥалас улууһун) оройуонун Бочуоттаах олохтооҕо, «Советтар знамялара», «Ленские маяки» хаһыаттарга эрэдээктэрдэринэн үлэлээбит Исай Прокопьевич Никифоров төрөөбүтэ 110 сылын көрсө, кини аатын үйэтитиигэ туһуламмыт айар күрэх түмүгүнэн бириэмийэни туттарыы үөрүүлээх быһыыга-майгыга ыытылынна.
Санатан эттэххэ, улууспут «Хаҥалас» хаһыатыгар ыччаты байыаннай-патриотическай тыыҥҥа иитиигэ, спорт, чөл олох тематыгар анаммыт суруйууларга куонкурус 2004 сыллаахха, И. П. Никифоров төрөөбүтэ 90 сылын көрсө олохтоммута. Куонкурус тэрийээччилэринэн V Малдьаҕар нэһилиэгин дьаһалтата, Хаҥалас улууһун Үөрэҕириигэ управлениета уонна «Хаҥалас» хаһыат редакцията, Россия Суруналыыстарын сойууһун Хаҥаластааҕы салаата буолаллар. Бу бириэмийэ икки сылга биирдэ, суруйааччы Исай Никифоров төрөөбүт күнүгэр — ыам ыйын 1 күнүгэр туттарыллар.
Аҕа дойду сэриитин кыттыылааҕа И. П. Никифоров аатынан бириэмийэ быйылгы лауреатынан биһиги хаһыаппыт общественнай корреспондена, СӨ спордун бэтэрээнэ, СӨ чэпчэки атлетикаҕа спорт маастара, марафонец Василий Можуков буолла. Тэрийээччилэр ааттарыттан Диплому уонна, харчынан бириэмийэни сахалыы тыллаах хаһыат эппиэттиир сэкирэтээрэ Людмила Аммосова туттарда.
Ону сэргэ, суруйааччы дьиэ кэргэнэ Гребневтэр бастыҥ суруйуулаах общественнай корреспонденнарга, суруналыыстарга анал бириис туттарар үтүө үгэстээх. Бу үгэс салҕанан, бүгүн Исай Никифоров сиэнэ, урбаанньыт Сергей Гребнев Анал байыаннай дьайыы тематыгар, доруобуйа харыстабылыгар, спортка хото суруйар Россия Суруналыыстарын сойууһун чилиэнигэр, «Хангалас» хаһыат корреспонденыгар Мария Васильеваҕа дьиэ кэргэн бириэмийэтин туттарда.
Ольга Гермогенова.