Быйыл Өктөмҥө кэрэ айылҕалаах Ой Бэскэ Кыайыы 80 сылыгар аналлаах өрөгөйдөөх ыһыах олус үрдүк таһымҥа ыытылынна. Ыһыахтыыр сирбит былырыыҥҥаттан саҥа тутуунан дьэндэйэн, быйыл өссө эбии алта ураһа, ыҥырыылаах ыалдьыттары аһатар беседка тутуллан өссө тубуста. Бу тутуулары саҕалаан тиһэҕэр диэри тиэрпит Альберт Стрекаловскайга нэһилиэк аатыттан махталбытын тиэрдэбит.
Ыһыах күнэ үүнэн, дьон бары долгуйан ыһыах түһүлгэтигэр киирэллэригэр киирии ааҥҥа Чапаев далбар хотуттара арчылыы тоһуйбуттара дьон сүргэтин көтөхтө.
Сиэр-туом түһүлгэтигэр бастакынан түөлбэлэр олохтоохторо, оҕолор эһээлэрин, эбээлэрин хаартыскаларын тутан киирбиттэрэ сонун көстүү буолла. Ол кэнниттэн алгысчыт Андриан Белолюбскай тоҕус туруйа уолаттарынан, сэттэ кыталык кыргыттарынан арыалланан түһүлгэҕэ киирэн алгыс этэн амалыйда, алгыс баһын сыалаата.
Өктөм норуот тыйаатыра Елизавета Рожина – Ил Ииһэ суруйбут “Күн көрүө, от үүнүө” тыыл үлэһиттэрин туһунан испэктээҕин итэҕэтиилээхтик туруорда. Ол кэмнээҕи тыыл үлэһиттэрэ бэйэлэрин харыстаммакка үлэлээбиттэрин, барыта кыайыы туһугар турууласпыттарын дьон хараастан көрдүлэр. Испэктээх кэнниттэн “Кыайыы вальсын” нэһилиэк олохтоохторо үҥкүүлээтилэр. Бу күн модун Арассыыйа күнэ буолан нэһилиэк уопсай хуора Михаил Глинка “Иван Сусанин” оператыттан «Славься» диэн ырыатын киһи эрэ сүргэтэ көтөҕүллэр гына ыллаан ньиргиттилэр. Нэһилиэк аҕа баһылыга Александр Большаков “Өктөм нэһилиэгин бочуоттаах олохтооҕо” үрдүк ааты Зинаида Ивановна Исаковаҕа туттарбытыгар дьон дохсун ытыс тыаһынан биһириирин биллэрдэ. Ыһыах аһын – арыылаах алаадьыны, уохтаах кымыһы, сыалаах эти төбүрүөннээн олорор ыалдьыттарга, олохтоохторго биһирэмнээн биэрдилэр, күндүлээтилэр. Ол кэнниттэн тута сөрөөн Оһуокай күрэҕэ саҕаланна. Быйыл оһуокай күрэһэ олохтоох оһуохайдьыт Егорова Мария Михайловна – Оһуокай Мааса 105 сылыгар ананан ыытылынна. Күрэһи оһуокайдьыт кыргыттара Зоя, Светлана, Марина Михайловналар спонсардаатылар.
Быйыл ыһыахха биэс сабыс саҥа ураһалары түөлбэлэр ылан киэргэтиигэ, сахалыы аска күрэхтэстилэр. Манна Чапаев сэлиэнньэтэ тэҥнээҕин булбата (депутаттар Андриан Белолюбскай, Алексей Андреев), иккиһи «Алаас» түөлбэ (депутаттар Татьяна Алексеева, Гаврил Слепцов), үсүһү“Өктөм” түөлбэ ( депутаттар Матрена Павлова, Петр Исаков) ылан үөрүүлэрэ үксээтэ.
Эбиэт кэнниттэн 5-12 саастаах оҕолорго анаан элбэх сахалыы күрэхтэр буоллулар. Манна спонсарынан Өктөм нэһилиэгин депутата Варвара Большакова буолла. «Өктөм кэскилэ» 13-17 саастаах уолаттарга сахалыы илии-атах оонньууларыгар илин-кэлин түһүстүлэр. Муҥутуур кыайыылаах Марсен Радионовка олохтоох депутат Андриан Белолюбскай сотовой телефон бэлэхтээтэ.
«Өбүгэ быстыбат ситимэ» норуот уус-уран айымньыларынан күрэс бэрт сытыытык ааста. Ол курдук, тойукка бириистэри нэһилиэк тойуксута Агафья Андреевна Иванова оҕолоро, сиэннэрэ туруоран улахан сэргэхсийиини таһаардылар.
Норуот ырыаларыгар бастакы бирииһи тыа хаһаайыстыбатын үтүөлээх үлэһитэ, биллиилээх хортуоппуйолордооччу Кривошапкин Николай Григорьевич уонна кэргэнэ Александра Дмитриевна сырдык ааттарыгар оҕолоро, кийииттэрэ туруордулар.
“Эгэлгэ кустук дьэргэлгэнэ” диэн сахалыы дьиэ кэргэнинэн күрэххэ 4 ыал кытынна. Бастакы миэстэни Чапаев сэлиэнньэтин олохтоохторо Акулина Афанасьевна, Евгений Семенович дьиэ кэргэттэрэ икки уолларынаан ыллылар, иккис Мария Дмитриевна, Илья Соломонович Соломоновтар дьиэ кэргэн, үһүс Дьокуускайтан сылдьар ыалдьыттарбыт Саргылана Семеновна, Степан Егорович Белолюбскайдар дьиэ кэргэн ылан үөрүүлэрэ үрдээтэ. Бу бириистэри «Орто дойду» урбаанньыттара туруоран бар дьону үөртүлэр.
Түөлбэлэр икки ардыларыгар ыытыллыбыт “Түөлбэ боотурдара”күрэххэ түөлбэттэн биир эр киһи, биир уол оҕо (12-14) сахалыы оонньууларга илин-кэлин түһүстүлэр. Бастакы миэстэни «Өктөм” түөлбэттэн Илья Шишигин, Леня Иванов, иккис «Сайдыы» түөлбэттэн Артем Алексеев, Коля Иванов, үһүс «Дьулуур» түөлбэттэн Денис Мыреев, Данил Захаров ылан кыайыы өрөгөйүн биллилэр. Бу күрэххэ спонсарынан олохтоох депутаттар уонна Покровскайтан Надежда, Борис Протодьяконовтар дьиэ кэргэттэрэ буоллулар.
Сылын аайы ыытыллар, дьон бары таптаан, сэргээн көрөр «Боотурдар оонньуулара» быйыл да олус сэргэхтик ыытылынна. “Үс төгүл үс” күрэххэ бастакы миэстэни Эдуард Рожков ылан ини-бии Сергей, Николай, Иван Ситниковтар 15 тыһ. бириистэрин, иккис Кирилл Кузьмин Филипп Иванович Филиппов сиэннэриттэн 10 тыһ. сертификат, үһүс Марсен Радионов ини-бии Ситниковтар 5 тыһ. бириистэрин туттулар. Бу көрүҥҥэ саамай эдэр кыттааччыга Роман Чувашовка спорт маастара Иванов Дмитрий Иванович мультиварка бирииһэ бэрилиннэ.
“Таас көтөҕүү” күрэҕэр бастакы Эдуард Рожков ИП “Слепцов М.В.” 20 тыһ. бирииһин, иккис Айаал Аянитов олохтоох дьаһалта суоппара Михаил Дмитриев 10 тыһ. бирииһин, үһүс Федот Колесов ИП «Кириллин В.В.»(“Эргиэн” м-н) аэрогриль бириистэрин ыллылар.
Хапсаҕай күрэҕэр 75 киилэҕэ диэри ыйааһыҥҥа бастакы Николай Адъютантов Елисеев Василий Валерьевич 15 тыһ. солкуобайдаах бирииһин, иккис Илья Шишигин Абрамов Анатолий Анатольевич 10 тыһ., үһүс Николай Острельдин олохтоох дьаһалта 5 тыһ. , 75 киилэттэн үөһээ ыйааһыҥҥа бастакы Игнатий Прохоров Алексеев Петр Вячеславович 15 тыһ., иккис Семен Копырин нэһилиэк дьаһалтатын 10 тыһ., үһүс Тимир Максимов ИП “Иванов К.С.” ( “Евгения” м-н) бассейн бириистэрин тутан үөрдүлэр. Бэтэрээннэргэ хапсаҕай күрэҕэр бастакы Семен Копырин норуот депутата Мамедов Алиш Забид-Оглы 25 тыһ., иккис Тимир Максимов ини-бии Ситниковтар 10 тыһ., үһүс Николай Баишев норуот депутата Егоров Владимир Анатольевич 10 тыһ. бириистэрин ылан олус долгуйдулар.
Мас-рестлинг күрэххэ 75 киилэҕэ диэри ыйааһыннаахтарга бастакы Айаал Аянитов Иванов Илья Васильевич туруорбут саха быһаҕынан, иккис Андриян Харитонов ини-бии Степан, Юрий Острельдиннар 10 тыһ. бириистэрин, үһүс Анатолий Адамов ИП «Наумова Т.Т.»(“Сайдам” м-н) компрессор туттулар. 75 киилэттэн үөһээ ыйааһыҥҥа бастакы Федот Колесов Демьянов Алексей Прокопьевич 30 тыһ., иккис Николай Слепцов Жирков Егор Алексеевич 10 тыһ., үһүс Александр Захаров «Киин маркет»маҕаһыынтан балаакка уонна утуйар мөһөөччүк бириистэрин ыллылар. Дьахталлар мас тардыһыыларыгар бастакы Андриана Кузьмина Вячеслав Петрович, Анна Алексеевна Алексеевтар дьиэ кэргэттэрэ туруорбут “Көмүлүөк” иһитин, иккис Лоредана Лепп Шевелев Василий Герасимович сахалыы дьахтар быһаҕын, үһүс Светлана Харлампьева норуот депутата Заморщикова Нюргуяна Юрьевна «Саха чай» бирииһин туттулар.
Хапсаҕайга кылаан кыайыыны ситиспит Игнатий Прохоров Гаврил Петров бааһынай хаһаайыстыбатын аатыттан ньирэйинэн наҕараадаланна.
Бу күрэхтэри хаһыс да сылын саҥаран-иҥэрэн, кэпсээн-ипсээн, күрэх күүрээннээх түгэннэрин хомоҕой тылынан киэргэтэн Илья Шишигин ыытта. Кэпсии-кэпсии, өссө бэйэтэ сүүрэн киирэн хапсаҕайга эмиэ хапсан ылбыта көрөөччүлэри астыннарда.
Киэһэ ыһыах кэнсиэригэр олохтоохтору кытта саҥа тахсан эрэр эстрада сулуһа Святослав Эверстов кэлэн ыалдьыттаата. Ньиргиэрдээх ытыс тыаһа дьон-сэргэ астыммытын бигэргэттэ. Кэнсиэр кэмигэр “Сэттэ” тутуу хампаанньатын сүбэһитэ Данилов Андрей Джурович ырыаһыппытыгар Дмитрий Рожиҥҥа уонна «Арылык»үҥкүү бөлөҕөр (салайааччы Надежда Черкашина) харчынан бириис туруорбута ыһыах үрдүк чыпчаалынан буолла.
Быйылгы Өктөм ыһыаҕар араас көрүҥҥэ бириистэри туруорбут үтүө санаалаах патриот дьоммутугар –спонсардарбытыгар норуот, олохтоох дьаһалта аатыттан барҕа махталбытын биллэрэбит!
Бу ыктарыылаах кэмҥэ саха төрүт бырааһынньыга – ыһыах үрдүк таһымҥа барарыгар бары кылааттарын киллэрбит бар дьоммутугар сүһүөхтээх бэйэбит сүгүрүйэн, хоолдьуктаах бэйэбит хоҥкуйан туран махтал бастыҥын аныыбыт!
Өктөмнөр маннык түмсүүлээх буоларбыт тухары өрөгөйдөөх ыһыахтар салҕана туруохтарыгар саарбахтаабаппыт!