Эркээни-2025
Быйыл «Эркээни-2025» ыһыах чэрчитинэн Тойук күрэҕэр дьүүллүүр сүбэҕэ киирэн үлэлээтим. Күрэххэ барыта 9 киһи кытынна, икки көрүҥүнэн ыытылынна: Кыайыы 80 сылыгар анаммыт эрдэ бэлэмнэниллибит тойугу толоруу уонна бэриллэр тиэмэнэн тута хоһуйан толоруу.
Тойуксуттары истэ олорон хомоҕой хоһоонноруттан, үөһээттэн тохтор добун тойуктарыттан олус үөрдүм, астынным. 9 киһи бары эриэ-дэхси эрийистилэр. Оннооҕор тута хоһуйууга эрдэттэн бэлэмнэммит курдук тыллара-өстөрө субу кутулла турара истиэххэ эриэккэс!
Саамай саастаах кыттааччыбыт Нөмүгүттэн быйылгы өрөспүүбүлүкэтээҕи “Эн сулускун” күрэх кылаан кыайыылааҕа Пелагея Семеновна киһи эрэ кутун-сүрүн хамсатар гына туойан доллоһуппута кэрэтик иһилиннэ. Бу куолаһа чөллөркөйүн, күүстээҕин, кылыһаҕа уста турар күүстээх үрэх уута кылыгырыырын курдук дьырылаан, киһи дууһатын күүскэ долгутта.
Мохсоҕолоохтон Мария Нератова куолаһа барыбытын сөхтөрдө. Тыла-өһө хомоҕойо, күүстээх куолаһа, тута хоһуйуута – барыта үрдүк таһымҥа толорулунна. Төхтүртэн Дария Захарова куоластыын, тас көрүҥүнүүн киһи эрэ астына көрөр Далбар Хотуна. Бастакы тойуга да, тута хоһуйуута да киһи эрэ истэ, көрө олоруох курдук астык этэ.
2-Дьөппөнтөн Саргылана Федорова эриэккэс куолаһа билигин да кулгаахпар иһиллэргэ дылы. Эдэр ыччаттар бөлөхтөрүттэн Покровскайтан Светлана Ильина тэҥнээҕин булбата. Талааннаах тойуксут тахсан эрэриттэн улаханнык саҥарбакка, сэмэйдик үөрдүбүт.
Үһүс истиэпэннээх диплому Саргылана Федорова, иккиһи Дария Захарова, 1-кыны Мария Нератова ыллылар. «Кылаан чыпчаал» үрдүк аатын Пелагея Семенова ылан кыайыы өрөгөйүн биллэ.
Эркээни хочотугар маннык күүстээх куоластаах тойуксуттар ыллаан-туойан доллоһуппуттара сайын кэлбитин кэрэһэлээн, ыраахха, кэрэҕэ угуйдулар!
Федора Фомина.