Бэс ыйын 27 күнүгэр, Сахабыт сирин уруккуттан доҕоро, космонавт Олег Кононенко Бастакы Бэрэсидьиэммит Михаил Николаев Ытык дойдутугар кэллэ.
Бүгүн кини Хаҥалас улууһугар Өктөм нэһилиэгэр Наука дьоҕус академиятыгар сырытта. Николаев- Кииҥҥэ, СӨ Бастакы Бэрэсидьиэнин архыып-бибилэтиэкэтин көрдө. Михаил Ефимович үлэлэрин, нэһилиэстибэтин, барылларын билистэ. Ол кэнниттэн үөрэнээччилэри кытта көрүстэ. Космонавт иннигэр, С.П. Ефремов аатынан Булгунньахтаах орто оскуолатын 9 кылааһын үөрэнээччитэ Дайаана Олесова уонна бу оскуола 7 кылааһын үөрэнээччитэ Филипп Скрябин «Космомания» уонна «Юный оператор БПЛА» диэн норуоттар икки ардыларынааҕы бырагыраамаҕа кыттыбыттарын кэпсээтилэр. Итини сэргэ көрсүһүүгэ Иван Михайлович Яковлев аатынан Покровскай куорат 1-кы №-дээх орто оскуолатын дириэктэрэ, виртуоз-хомусчут Спиридон Шишигин кыттыыны ылла.
Көрсүһүүгэ кэлбит оҕолор космоһы кэрэхсииллэрэ олус эбит, ыйытык бөҕөтүн биэрдилэр. Космонавт оҕолорго барыларыгар толору хоруйдаан истэ. Биир киһи үөрэ уонна киэн тутта көрөрө баар Хабаровскай кыраайтан, Охуотскай уокуруктан Арка диэн кыра бөһүөлэктэн XI кылаас үөрэнээччитэ Герман Рябоконь тус этиилээх уонна көрдөһүүлээх Олег Кононенконы кытта көрсүһэ кэлбитэ буолла. — Биһиги, аҕыйах ахсааннаах норуоттар оҕолоро, Космонавтика түмэлин көрүөхпүтүн, экскурсияҕа сылдьыахпытын баҕарабыт. Кэлин биһигиттэн ким эмит космонавт буолуоҕар эрэнэбит, итэҕэйэбит, — диэтэ дьоһуннук туттан туран Герман.
Биһиги билэбит уонна киэн туттабыт Олег Кононенконан, кини космос куйаарыгар Норуоттар икки ардыларынааҕы станцияҕа иккис көтүүтүгэр, тус малларын иһигэр саха хомуһун илдьэ тахсыбыта, дьүрүһүтэ оонньообута. Онтон үһүс көтүүтүгэр Саха суругунан литературатын төрүттээччи Алексей Кулаковскай – Өксөкүлээх Өлөксөй айымньыларын таһаарбыта уонна МКС бортуттан «Хомус» диэн хоһоонун аахпыта.
Уйбаан УЙГУУРАП, ааптар хаартыскаҕа түһэриитэ уонна видеоҕа устуута: https://t.me/gazetahangalas/40317