Кыайыы 80 сылыгар
Хачыкааттан педагогическай үлэ, тыыл бэтэрээнэ, кыраайы үөрэтээччи Гавриил Михайлович Герасимов дойдутугар бар-дьонун Аҕа дойду Улуу сэриитигэр кыттыытын, тыылга бэйэни харыстаммакка үлэтин үйэтитиигэ олус улахан үтүөлээх. Сыл-хонук аастаҕын аайы «суруллубут суоруллубат» дииллэринии, суруйуулара өссө күндүтүйэн иһэр. Хачыкаат нэһилиэгин дьаһалтата (ааптар баарыгар даҕаны – баһылык Ирина Оболкина өйөбүлүнэн) үп-харчы булан кэмигэр бэчээккэ таһааран хаалларбыта хайҕаллаах дьыала. Бүгүн Гавриил Герасимов «Өйдөбүнньүк» кинигэтиттэн Платонов Николай Егорович-Боппууда туһунан ахтыыны бэчээттиибит.
Дьоппуоннары кытары сэриигэ кыттыбыта
Биһиги аҕабыт Николай Платонов (Боппууда) (1927 с.т.) Дьөппөн тыатыгар Хаанньаа диэн сиргэ алтыс оҕонон күн сирин көрбүтэ. Бииргэ төрөөбүттэрэ үс кыыс, үс уол этилэр. Аҕата Платонов Егор Тихонович, ийэтэ Ефремова Марина Устиновна.
Сэрии иннигэр аҕабыт Дьөппөн оскуолатыгар үөрэнэн испит. Сэрии саҕаламмытыгар убайдара Спиридон бастакы хомуурга, Тихон 1942 с. барбыттара. Оскуола паартатын хаалларан, холхуоска убайдарын солбуйбута. Хонуу үлэлэригэр: бурдук быһыытыгар, от охсуутугар, күһүҥҥү хомуурга, от-мас тиэйиитигэр үлэлээбитэ.
1945 с. 18 сааһын туолаат да, армияҕа ыҥырыллыбыта. Японияны утары сэриигэ Квантунскай армияны үлтүрүтүүгэ кыттыбыта. «Японияны кыайыы иһин» мэтэллээх этэ. Алта төгүрүк сыл буолан баран, 1951 с. төрөөбүт сиригэр эргиллибитэ.
Кэлээт да дьолун, Васильева Анна Ивановнаны көрсөн, сөбүлэһэн ыал буолбуттара. Ол сыл күһүнүгэр холхуос салалтата кинини биир сыллаах механизация оскуолатыгар үөрэххэ ыыппыта. Тракторист идэтин баһылаан, 1952 с. тимир көлөҕө олорбута уонна 40-ча сыл илиитин араарбакка үлэлээн пенсияҕа тахсыбыта. Кини курдук тимир көлөнү баһылаабыт киһи Дьөппөҥҥө тарбахха баттанар. Элбэх ыччаты тракторист идэтигэр үөрэппитэ, уһуйбута.
Үлэни өрө туппут киһи 1965 с. Россияҕа социалистическай куоталаһыы кыайыылааҕынан тахсыбыта. «Коммунистическай үлэ удаарынньыга» үрдүк ааты ылбыта. «Үлэ бэтэрээнэ», Кыайыы үбүлүөйдэрин мэтээллэрэ, элбэх өрөспүүбүлүкэ, оройуон, нэһилиэк, холхуос, сопхуос бочуот, хайҕал, махтал суруктара кини үлэтин кэрэһэлииллэр.
Платонова Альбина Николаевна, кыыһа.
20.04.2005 с.