«Ыччат десана» патриотическай акция чэрчитинэн Саха сирин улуустарыттан араас үөрэх кыһатыгар үөрэнэр устудьуон оҕолору сомоҕолуур «ZEMA» («ЗЁМА») диэн өрөспүүбүлүкэтээҕи эдэр ыччат уопсастыбаннай түмсүүтүн көхтөөх кыттааччылара, уопсайа 11 устудьуон оҕо Тумул нэһилиэгэр кэлэн үлэлээн, Анал байыаннай дьайыыга кытта сылдьар уолаттардаах соҕотох олорор ийэлэргэ көмөлөһөн бардылар.
Устудьуоннар бары да тыа сириттэн сылдьар оҕолор эбит, онон сир-буор, тутуу үлэтигэр сыһыаннаахтара, бүгүрү үлэһиттэрэ биһигини олус үөртэ. Бастакы күннэригэр аҕыйах чаас иһигэр уолаттар 70-ча баҕана маһын хатырыктаатылар, ол кэмҥэ кыргыттар биир ийэҕэ баран хортуоппуйун бааһынатын сыыс отун ыраастаатылар. Иккис күннэригэр нэһилиэк спортивнай былаһааккатыгар олохтоох ыччаты, эр дьону кытта палисадник күрүөтүн туттуллар уонна ыһыахтыыр түһүлгэҕэ саҥа тутуулары кырааскалаатылар. Үһүс күннэригэр эбиэккэ дылы оһох көтүрүүтүгэр көмөлөстүлэр.
Аҕыйах кэм иһигэр бу оҕолор нэһилиэкпит сайдыытыгар бэйэлэрин кылааттарын киллэрсэн умнуллубат үтүө өйдөбүлү хааллардылар. Маннык үтүө үлэһит ыччаты ииппит төрөппүттэригэр уонна акцияны тэрийбит бөлөххө, өрөспүүбүлүкэ, улууспут салалтатыгар барҕа махталбытын тиэрдэбит. Оҕолор үтүө дьыалалара бэйэлэригэр сүүс төгүл үтүөнэн эргиллэн кэллтн! Барыларыгар чэгиэн туругу, үөрэхтэригэр, уопсастыбаннай үлэлэригэр ситиһиини, тус олохторугар дьолу-соргуну баҕарабыт!
Сахаяна Лукина, Тумул с.
Устудьуоннар умнуллубат үтүө өйдөбүлү хааллардылар
