Алтынньы 1-3 күннэригэр Чапаев сэлиэнньэтигэр Бастакы президеммит Михаил Николаев сырдык кэриэһигэр анаммыт «Кэскили түстүүр идиэйэлэр» III Николаевскай форум ыытыллар.
Тэрээһиҥҥэ СӨ Бырабыыталыстыбатын бэрэссэдээтэлин солбуйааччы Георгий Степанов, Форум тэрийэр кэмитиэтин бэрэссэдээтэлэ, Ил Түмэн бэрэссэдээтэлин солбуйааччы Афанасий Владимиров, Форум дириэктэрэ, Ил Түмэн иһинэн Ыччат парламенын бэрэссэдээтэлэ Антон Васильев, РФ сенатора Егор Борисов, Ил Түмэн бэрэссэдээтэлэ Алексей Еремеев Ил Түмэн дьокутааттара, Хаҥалас улууһун баһылыга Сергей Гребнев, улуус мунньаҕын бэрэссэдээтэлэ Анатолий Антонов кыттыыны ыллылар.
Быйылгы 3-с Форумҥа эдэр исписэлиистэртэн хаһааҥҥытааҕар да элбэх, барыта 350-тан тахса сайаапка киирбит. Сүүмэрдээһин кэнниттэн 80 киһи ыҥырыллан кытта сылдьар. Талыллыбыт кыттааччылар ортолоругар нэһилиэк баһылыктара, улуус баһылыктарын солбуйааччылара, оскуола дириэктэрдэрэ, тэрилтэ салайааччылара, урбаанньыттар, инженердэр, суруналыыстар бааллар. Кыттааччылар орто саастара 28 саас.
СӨ Бырабыыталыстыбатын чилиэннэрэ уонна Ил Түмэн салалтата кыттыылаах Форум арыллыытын кэнниттэн бочуоттаах ыалдьыттар кыттыылаах “Сильные бюджеты для муниципалитетов: молодежные идеи для инвестиций и роста” диэн тиэмэҕэ сүрүн панельнай сессия буолла. Чуолаан нэһилиэктэргэ, ыраах улуустарга өрөспүүбүлүкэбит инникитэ чочуллар.
Форум бырагырааматыгар баар практическай сессиялар, кыттааччылар кэмпитиэнсийэлэрин күүһүрдэр уонна барылларын бэйэлэрин оройуоннарыгар олоххо киллэрэллэригэр төһүү күүс буолуоҕа. Быйылгы сылга форум сүрүн сыалынан-соругунан муниципалитеттар экэнэмиэкэлэрин бигэ туруктаах буолууларын үрдэтэр хайысхалаах, ону сэргэ, тастан инвестицияны тардыы, тыа хаһаайыстыбатын уонна урбааны сайыннарар бырайыактар буолуохтара. Николаевскай форум өрөспүүбүлүкэбит брендин быһыытынан биллэр. Кыттааччылар этиилэрэ, идиэйэлэрэ – эрэгийиэн социальнай-экэнэмиичэскэй сайдыытын стратегиятыгар көстөр, сырдатар-билиһиннэрэр бырайыактара олоххо киирэр. Үгүс кыттааччылар үлэ салааларынан каадыр резервэтигэр бааллар уонна бэлиэр эрэгийиэммит сайдыытыгар бэйэлэрин кылааттарын киллэрэ сылдьаллар.
Уйбаан УЙГУУРАП, ааптар видеоҕа устуута уонна хаартыскаҕа түһэриитэ: https://t.me/gazetahangalas/44019