Бүгүҥҥү ураты үөрүүлээх күҥҥэ, Эбии үөрэхтээһин киинин арыйар аалай кыһыл лиэнтэни Хаҥалас улууһун баһылыгын бастакы солбуйааччы Егор Варламов, үөрэх салаатын салайааччыта Юрий Шадрин, Эбии үөрэхтээһин киинин дириэктэрин эбээһинэһин толорооччу Наталья Шадрина уонна «Медиацентр «ОКО» иитиллээччитэ Надя Петрова быстылар.
Маны сэргэ үөрүүлээх тэрээһиҥҥэ «Якутцемент» ПХ АУо управляющай дириэктэрэ, Ил Түмэн дьокутаата Алиш Мамедов, Өрөспүүбүлүкэтээҕи «Юные якутяне» Ресурснай киин дириэктэрэ Айал Соловьев, СӨ оҕолор уопсастыбаннай түмсүүлэрин бэрэссэдээтэлэ, Бүтүн Россиятааҕы «Бастакылар хамсааһыннара» оҕолор уонна ыччаттар хамсааһыннарын тэрийээччитэ Геннадий Охлопков, Покровскай куорат баһылыга Виктор Константинов кыттыыны ыллылар.
«Хаҥалас» Оҕону эбии үөрэхтээһин киинэ оҕо-аймах дьоҕурун, сатабылын сайыннарар аныгылыы тэриллэринэн толору хааччыллыбыт. Хас биирдии кабинет табыгастаахтык, тупсаҕайдык оҥоһуллубут. Манна биэс хайысханан 616 сайдыылаах, билиилээх, сатабыллаах олоххо көхтөөх оҕо аймах түмсэр. Кинилэр оонньуулары ыыталлар, патриотизм тиэмэтигэр, тулалыыр айылҕаны харыстааһыҥҥа, туризмҥа, үбү-харчыны эргитиигэ бырайыактары көмүскүүллэр. Хаҥалас улууһун оҕолоро өрөспүүбүлүкэтээҕи бэстибээллэргэ инники күөҥҥэ сылдьаллар. Киин үлэтэ өссө тэтимирэн араас куруһуоктар, ол иһигэр IТ-киин иһинэн хайысхалаах үөрэхтэр, графическай дизайнҥа уһуйуллуу, «Күн арылы» үҥкүү ансаамбылын оҕолорун эрчиллиилэрэ, оҕолор интэриэстэринэн түмсүүлэрэ ыытыллаллар.
Уйбаан УЙГУУРАП, ааптар видеоҕа устуута уонна хаартыскаҕа түһэриитэ: https://t.me/gazetahangalas/44529