Улуус дьаһалтатын мунньахтыыр саалатыгар «Саха Боотур» байыаннай-спортивнай бэлэмнэнии уонна патриотическай иитии киинин көҕүлээһининэн эрэгийиэннэр икки ардыларынааҕы сүлүөтү тэрийиигэ сүбэ мунньах буолла. Мунньахха Хаҥалас улууһун баһылыга Сергей Гребнев, солбуйааччыта Николай Степанов, улуус мунньаҕын бэрэссэдээтэлэ Анатолий Антонов, дьокутаат Елизавета Мартынова, байыаннай дьайыы бэтэрээннэрин сэбиэтин чилиэнэ Михаил Абрамов, Ил Түмэн дьокутаата, патриотическай иитиигэ уонна Анал байыаннай дьайыы кыттыылаахтарын дьыалаларын кэмитиэтин бэрэссэдээтэлэ Александр Подголов, “Көмүлүөк” атыы-производственнай хампаанньатын генеральнай дириэктэрэ, СӨ урбаанньыттарын Ассоциациятын бэрэссэдээтэлэ Ольга Григорьева уонна уопсастыбанньыктар кыттыыны ыллылар.
«Саха Боотур» уһуйаан оҕону кыра эрдэҕиттэн үлэҕэ, сатабылга, спортка эт-хаан өттүнэн эрчийэн күүстээх, кытаанах санаалаах, тулуурдаах, туруоруммут соругун ситиһэргэ дьүккүөрдээх, кыайыгас-хотугас, хотоойу санаалаах буоларга иитэр. Итинник иитиллибит оҕо, ыччатолох бары эриирин-мускуурун эрэллээхтик туоруур, санаатын түһэрбэт, инникигэ дьулуурун сүтэрбэт, сынтарыйбат майгылаах буола улаатар.
— Аны сайын Улахан Ааҥҥа «Ампаардаах» алааска «Саха Боотур» байыаннай-спортивнай бэлэмнэниигэ уонна патриотическай иитиигэ киинэ (дириэктэр Андрей Артамонов-Малдьаҕар Бөртө) эрэгийиэннэр икки ардыларынааҕы сүлүөтү Россияҕа Норуоттар сомоҕолоһууларын, Сахабыт сиригэр Култуура сылларыгар анаан тэрийиэҕэ. Бу тэрээһиҥҥэ дойду биэс эрэгийиэниттэн уонна Москва куораттан, итини таһынан Москва куорат дьокутааттара, эрэгийиэннээҕи сэбиэт дьокутааттара, дойдубут патриотическай холбоһуктарын салайааччылара сүлүөккэ кыттыыны ылыахтара, — диэн иһитиннэрдэ Андрей Артамонов-Малдьаҕар Бөртө.
Уһуйаан ыччаты иитиигэ-такайыыга биир кэлим методическэй, теоретическай уонна практическай үлэни ыытар. Уопсайынан уолаттары, ыччаттары эт-хаан эрэ өттүнэн буолбакка баай духуобунай ис култууралаах, эргиччи дэгиттэр, дойдуһа туруктаах киһини иитэн таһаарар соруктаах.
Уйбаан УЙГУУРАП,
Хаартыскалар Андрей Артамонов тус архыыбыттан туһанылыннылар.