Дьокуускайга «Авиатор» киинэ тыйаатырыгар «Мэхээлэчээн булчут» саҥа тахсыбыт киинэни айбыт хамаандаҕа, оонньообут артыыстарга, күүс-көмө буолбут спонсордарга, сонуннары киэҥник тарҕатар средстволар суруналыыстарыгар биир бастакынан билиһиннэрии буолла.
Киинэ биһиги улууска олоро, үлэлии сылдьыбыт, көмүс уҥуоҕа манна хараллан сытар биллиилээх суруйааччы-фронтовик Тимофей Сметанин уонна кини доҕоро, педагог Яков Стручков өссө сэрии иннинэ саҕалаан 1943 сыллаахха бэчээккэ таһаартарбыт «Мэхээлэчээн булчут кэпсээннэрэ» айымньыларыгар тирэҕирэн таҕыста. Олус үчүгэй, оҕолорго, төрөппүттэргэ, киһи аймах үйэлээх сыаннастарыгар анаммыт дьоһун үлэ буолла, астына көрөн кэллим.
Бу аныгы оҕолорго компьютернай технологиялары туһанан, кыыллары, харамайдары сатабыллаахтык саҥардан түһэриллибит, көрдөөх, күлүүлээх сэргэх киинэ буолла. Киинэни көрдөрүү иннинэ продюссердары, сценаристары, артыыстары, айымньы күн сирин көрүүтүгэр бары кыттыбыт дьону, ол иһигэр «Сахабэчээт» ГАУ, «Улусмедиа» хамаандаларын СӨ инновацияҕа, цифровой сайдыыга уонна инфокоммуникационнай технологияларга миниистир Петр Николаев истиҥник эҕэрдэлээтэ, наҕараадалары туттарда. Элбэх киһи тыл эттэ, ол иһигэр айылҕа харыстабылын министиэристибэтиттэн, биһиги тэрилтэлэрбититтэн о.д.а.
Кулун тутар 19 күнүттэн «Мэхээлэчээн булчут» киэҥ экраҥҥа тахсар. Киинэ аныгы оҕо дьиикэй айылҕаҕа эһээтинээн тахсарын, мүлчүргэннээх сырыыларга түбэһэрин, ол быыһыгар Тимофей Сметанин суруйбут булт умсугутуулаах, алыптаах кэпсээннэриттэн эһээтин аатыттан ахтылларын олус сатабыллаахтык киллэрбиттэрэ кэпсэнэрэ, кыыллар кыттыылара олус бэрт. Киһи биир тыынынан көрөр айымньыта. Онно эбии төрүт үгэстэрбитигэр үөрэтии, хатыламмат кэрэ айылҕабыт – үгүс үлэттэн айыллыбыт киинэ буолла. Кыракый артыыстарбыт оонньуулара киһи көрө олоруох курдук. Кэпсии барбаппын, хайаан даҕаны көрүҥ, оҕолоргутун билиһиннэриҥ. Киинэ сахалыы тыллаах эрээри, тылбаастаах – аҥардас оонньууларынан да биир тыла суох өйдөнүмтүө, искусство абылыыр күүһэ диэн итини этэн эрдэхтэрэ. Хайаан даҕаны билсиҥ.
Бу күннэргэ режиссер Александр Лукин хамаандата күөх экраҥҥа таһаарбыт «Мэхээлэчээн булчут» өссө норуоттар икки ардыларынааҕы «Дух Огня» улахан таһымнаах фестивальга кыттар. Бу күрэххэ Кытай, ЮАР, ОАЭ, Колумбия, Австрия, Испания, Венгрия, Германия о.д.а. киинэ айааччылара үлэлэринэн кытталлар. Саха киинэтигэр ситиһиилэри баҕарыаҕыҥ!
Людмила Аммосова.
Арина Яковлева хаартыскаҕа түһэриилэрэ уонна «Сахабэчээт» «Мэхээлэчээн булчут» саҥа тахсыбыт тэттик кинигэтиттэн.
