Социальнай хантыраак
Нөмүгү нэһилиэгин олохтооҕо, түөрт оҕолоох ийэ, улахан дьиэ кэргэн хаһаайката Нина Егорова ааспыт сыл муус устарыгар улуустааҕы социальнай харысхал управлениетын кытта социальнай хантыраак баттаһан дьиэтигэр «Ай Санаа» диэн ателье арыйан үлэлэтэр.
Нина бэйэтэ идэтинэн менеджер, өр кэмҥэ атыы-эргиэн эйгэтигэр үлэлээбит. Ол эрээри оҕо эрдэҕиттэн баайар, кыралаан иистэнэр буолан уонна кэнники сылларга айар-тутар санаата үүйэ тутан, бэйэ дьыалатын тэринэн үлэлииргэ быһаарыммыт. Кини бу идеятын кэргэнэ Арсений (бэйэтэ тутуунан дьарыктанар) өйөөн, дьиэтигэр Нина иистэнэригэр анаан хос оҥорон, билигин сакаасчыттарын кытта көрсөр, айар-үлэлиир дьоҕус ательелаах.
— Бэйэм иистэнньэҥ үөрэҕим суох эрээри тигэрбин олус сөбүлүүбүн. Оҕо эрдэхпиттэн икки өттүбүттэн тарбахтарыгар талааннаах эбээлэрим иистэнэллэрин көрөн улааппытым. Онон бу дьоҕурум кинилэртэн бэриллибит дии саныыбын. Бастакы иискэ сакааһым 2016 сыллааххакиирбитэ. Оччолорго улахан кыыһым үҥкүү куруһуогар дьарыктанара, онно төһө да долгуйдарбын, кэлэктиип көстүүмүн тигиигэ сакаас ылбытым. Онтон ыла улам-улам дьонтон сакаастар киирэн саҕалаабыттара. Былырыын бизнес-былаан оҥостон, этэҥҥэ көмүскээн, социальнай хантыраак ылбытым. Бу 450 тыһ. солкуобай суумалаах өйөбүлүнэн өр сылларга ыра оҥостубут тэриллэрбин атыылаһаммын олуһун үөрбүтүм. Ол курдук, промышленнай иистэнэр массыына, оверлок,быысапкалыыр массыына уонна да атын иистэнэр тэриллэрбин ылбытым. Иистэнньэҥнэр бэйэлэрэ да билэрбуолуохтаахтар, боростуой массыыналар түргэн баҕайытык алдьаналлар, сорох матырыйаалы кыайбат да буолаллар.Социальнай хантыраак саҥа саҕалааччыларга, элбэх оҕолоохторго дьарыктаах, дохуоттаах буолларыгар улахан көмөлөөҕүн бэйэбинэн биллим, — диир Нина Егорова.
— Нина, ательеҥ «Ай Санаа” диэн ааттаах диэтиҥ дии, онно анал логотиптааххын дуо?
— Ательем аата «Ай-тут санаабыккын» диэн суолталаах.Хаҥаластар хотой кыыл бэлиэлээхпит, онон тикпит таҥастарбар хотой эмблемалаах, “Ай Санаа” диэн суруктаах этикетка иилэбин эбэтэр быысапка түһэрэбин.
Нина тикпит таҥастарын хаартыскаларын көрбүтүм, холобура, сахалыы харысхаллаах свитшокка бу маннык бэлиэ, чахчы, олус уратытык, сонуннук көстөр эбит, киһи эрэ хотой ойуулаах таҥас кэтиэн баҕаран кэлэр. Иистэнньэҥ билигин үксүн Нөмүгү, Покровскай оскуолаларыттан, уһуйааннарыттан сахалыы көстүүмнэри тигиигэ уонна биирдиилээн дьонтон араас сакааһы ылар. Кини этэринэн, ыйга 10-15 сакаас киирэр, ардыгар элбиэн да сөп. Санаатынан айар-тутар иистэнньэҥ Нинаҕа бу сүрэҕин баҕатынан толорор үлэтигэр үрдүк ситиһиилэри баҕарыаҕыҥ.
Ольга Гермогенова.
Хаартыскалар Нина Егорова тус архыыбыттан.
