Үөрэх эйгэтэ
Тиит Эбэҕэ «Дьиэ кэргэн уонна оскуола ситиһиигэ — бииргэ» аһаҕас аан тэрээһинэ буолла. Үөрэнээччилэрбит ырыа, үҥкүү алгыстаах кэлбит төрөппүттэри көрүстүлэр. Үөрүүлээх тэрээһини психолог Светлана Захарова ыытта.
Бу үөрэх сылыгар оҕолор ситиһиилэрин төрөппүттэргэ үөрэх чааһын сэбиэдиссэйэ Саргылаана Васильева билиһиннэрдэ. «Улахан эрэл кыра саада» диэн Сибэкки хоһун арыйыыга биология учуутала Мария Солдатова, дириэктэр Марина Ли, 8 кылаас үөрэнээччитэ Ира Строева лиэнтэни үөрүүлээх быһыыга быстылар . Төрөппүттэрбит сибэкки арааһын тутан кэлэн бэлэх ууннулар. Кинилэргэ уопуттаах технология учуутала Татьяна Борисова «Сибэкки эйгэтэ», иитээччилэр Кристина Маркова «Мыльное Чудо», Наталья Яковлева, Анна Архипова «Сибэкки абылаҥа» үүнээйини олордуу кистэлэҥнэрин кэпсээтилэр, олордон көрдөрдүлэр. Бу күн үлэ уруогун учуутала Алексей Ивановы кытарыуолаттар аҕаларынаан олоппос оҥордулар. Быйыл элбэх аҕа кэлэн үөртүлэр. Оннооҕор тохсус кылаас үөрэнээччитэ Милана Алексеева аҕатынаан туора турбакка олоппоһу уһаннылар.
Дьокуускай куораттан ХИФУ иитиигэ уонна социализацияҕа кафедратын сэбиэдиссэйэ Геннадий Охлопков кэлэн төрөппүттэргэ уонна учууталларга лекция аахта, сэргэх кэпсэтии буолла. Сардана Борисова төрөппүттэри кытта анал бырайыагынан үлэлээтилэр. Эбиэт кэннэ Покровскайтан старшай психолог Марианна Забаловская, педагог-психолог Мария Слепцова төрөппүттэргэ, учууталларга уонна 9 кылаас оҕолоругар аһаҕас кэпсэтиини, төгүрүк остуолу, онтон кылаас салайааччылара, иитээччилэр кылаас-чаастары ыыттылар. Бу күн оҕолор төрөппүттэрин кытта оскуола, интернат олоҕор бииргэ кытыннылар. Тэрээһиннэр түмсүүлээхтик аастылар. Инникитин бары бииргэ, үлэлэһиэх буолан тарҕастыбыт.
Анастасия Мордовская, Тит-Эбэ.
