РФ Биэнсийэҕэ уонна социальнай страховкалааһыҥҥа пуондатын Саха сиринээҕи салаатын Хаҥаластааҕы килийиэн сулууспатын салайааччыта Марина Васильева мобильнай биригээдэ үлэтин билиһиннэрдэ.
— Россия Социальнай Пуондатын Саха сиринээҕи салаатын Хаҥалас улууһугар килийиэн сулууспатын исписэлиистэрэ, итини сэргэ улуус социальнай харалтаҕа управлениетынуонна «Мин докумуоннарым» Элбэх хайысхалаах киин үлэһиттэрэ холбоһуктаах биригээдэлэрэ былаан быһыытынан бүгүн 1-кы Малдьаҕар нэһилиэгэр уонна Тойон Арыы учаастагар сылдьаллар. Кинилэр сүрүн соруктарынан, өрүү буоларын курдук, дьон-сэргэ пенсионнай уонна социальнай бырааптарын быһаарыы, сүбэлээһин буолар. Сыл саҕаланыаҕыттан Социальнай пуонда исписэлиистэрэ улууспут уһук уонна соҕуруу нэһилиэктэригэр Иһиккэ, Кытыл Дьураҕа, Үөдэйгэ, Сиинэҕэ, Тиит Арыыга уонна илин эҥэр Самыртай сыһыытын нэһилиэктэригэр I-кы, II-с Дьөппөҥҥө, Хоточчуга, Хачыкаакка уонна Кыһыл Үрүйэҕэ сылдьыбыттара, дьон-сэргэ кыһалҕалаах ыйытыктарыгар миэстэтигэр хоруйдаабыттара, туһааннаах дьаһаллары ылбыттара.
Тыа сирин олохтоохторо чуолаан Ийэ хапытаалын туһаныыга, кырдьар сааска пенсияҕа тахсыыга страховой пенсия ананыытын, доруобуйаларынан хааччахтаах дьону анал тиэхиньичэскэй тэриллэринэн хааччыйыы, Анал байыаннай дьайыы кыттыылаахтарыгар докумуоннарын толорууга тус мунаарар ыйытыктарыгар хоруйдары, сиһилии быһаарыылары, сүбэлэри ылар кыахтаннылар. Маны таһынан, кэлбит дьон Социальнай пуондаттан судаарыстыбаннай өҥөлөрү электроннай көрүҥүнэн ылыахтарын сөбүн туһунан быһаарыылары иһиттилэр. Килийиэн сулууспата дьону көрсөр эбии күннэрин, сыыппара дастабырыанньалары хайдах оҥотторуохха сөбүн уонна маны туһаныы туһунан туоһуластылар.
Социальнай пуонда исписэлиистэрэ кэлбит дьоҥҥо бары, туһааннаах кыһалҕалаах ыйытыктарыгар муҥутуур толору хоруйдары биэрдилэр, өссө табыгастаах буоллун диэн бэчээттэммит матырыйааллары түҥэттилэр.
Уйбаан УЙГУУРАП.
Хаартыскалары ааптар тиксэрдэ.
