Култуура сылыгар
Бу күн Покровскайга «Саргы түһүлгэтэ” култуура уонна сынньалаҥ киинигэр 11 үҥкүү кэлэктииптэрэ мустан күрэс дьоро түгэннэрин бэлэхтээтилэр. Василиса Егоровна Романова үйэ аҥарыттан ордук “Эркээни эдэр сааһа” үҥкүү норуодунай ансаамбылын салайбыт, Хаҥалас ыччатын хореография кэрэ эйгэтигэр уһуйбут ытык киһибит этэ – Саха АССР култууратын үтүөлээх, СӨ култууратын уонна искусствотын бочуоттаах үлэһитэ, улууспут, бастакы Малдьаҕар нэһилиэгин бочуоттаах олохтооҕо, кэрэ, сэмэй патриот.
Сонун үҥкүүлэри бэлэхтээтилэр
Олус бэрт кэлэктииптэр кэлэн Василиса Егоровна ансаамбылын репертуарыттан уонна биирдии нүөмэри дойдубут норуоттарын үҥкүүлэриттэн толорон сонун айымньылары билиһиннэрэн бардылар. Ким кыайыылаах тахсыбытын билиһиннэрэ охсуум.
Ол курдук, толоруулары сыаналыыр сүбэ быһаарыытынан Гран-прины Покровскай 1 №-дээхорто оскуолатын “Хаҥаласчаан” оҕо образцов айансаамбыла (сал. “Эркээни эдэр сааһа» ансаамбылга үҥкүүлүү сылдьыбыт педагог Наталья Кузьмина) ылыан ылла, этэргэ дылы, бэркэ туруоруллубут үҥкүүлэринэн, толоруу техникатынан, сыанаҕа тутта-хапта сылдьыынан, чаҕылхай көстүүмнэринэн, айымньы ис хоһоонун толору арыйыытынан.
Бары да кэлэктииптэр бэркэ бэлэмнэнэн кэлбиттэрэ көстөр. Василиса Романова туруорбут “Чороонноох”, “Хомустаах” үҥкүүлэрин сэргэ сонун туруоруулары көрдүбүт, оҕолорго, улахан да дьоҥҥо. Мэктиэтигэр Василиса Егоровнабыт сыана быыһын кэннигэр үгэһинэн долгуйа кэтээн көрө турарын курдук, алтыһан ааспыт дьон, санаан ыллыбыт. Үҥкүүлэтэн, маастарыстыбаларын чочуйан ааспыт ансаамбылын оҕолоро түһэн биэрбэтилэр, бырааһынньыкпытын киэргэттилэр, үрдүк таһымҥа туралларын бигэргэттилэр, бастыҥ көстүүмнэринэн кытары анал бирииһи ыллылар. Кыра саастаах оҥолорго Нөмүгүттэн “Махтал,Таптал” диэн ааттаах Лена Дмитриева салайар элбэх оҕолоох ансаамбыла бастакы истиэпэннээх лауреат аатын ылла, бу кырачааннар Дьокуускайга Хаҥалас күннэригэр кэнсиэргэ миигин хотугу үҥкүүлэринэн отой абылаан тураллар. Бу бөлөххө иккис миэстэҕэ “Күн арылы” (сал. Сардаана Спиридонова), үһүскэ Покровскайдааҕы Искусство оскуолатын олус да кэрэ таҥастаах-саптаах кыракый оҕолорун толоруута таҕыста (сал.Татьяна Павлова). Салгыы иһитиннэрэр буоллахха,12-17 саастаахтарга “Эркээни эдэр сааһа” (Наталья Кузьмина, Валентина Никифорова, Татьяна Матвеева), иккискэ Ойтон “Күн Арылы”, үһүскэ саҥа көстөн эрэр “Оһуор” үҥкүү кэлэктиибэ ( сал. Сахаяна Потапова) лауреаттарынан буоллулар. “Оһуордар” өссө “Куонкурус арыйыыта” анал аакка тигистилэр. Бу бастакы улахан ситиһиилэринэн эҕэрдэлиэҕиҥ!
18-35 саастаахтарга Жатайдааҕы техникумтан “Кэрэл” (сал. Сахая Потапова) ансаамбыл тэҥнээҕин булбата. Аҕыс паара таҥнан-симэнэн тахсан ньиргиччи үҥкүүлээбитэ саҥа сүүрээни киллэрдэ. Улахан дьоҥҥо “Сардаана” кэлэктиипПокровскайтан “Сардаана” уһуйаантан (сал. Эльвира Кулачикова, Татьяна Матвеева) көх-нэм буола кэлэн бастаата, Нөмүгүттэн ”Кэрэ эйгэ” иккистээтэ, Покровскайтан “Сказка” уһуйаантан “Вдохновенье” (сал. Сахая Потапова) үһүс буолла.
Жатайтан кытта кэлбит техникум “Кэрэл” бөлөҕө Романовтар дьиэ кэргэттэрин анал бириистэрин туттулар. Бу кэлэктиип сонун көстүүмнэринэн, үҥкүүнү толоруу маастарыстыбатынан сөхтөрдө.Өссө биир анал бирииһи Улахан Аантан кэлэн эмиэ олоххо көхтөөх көрүүлээх, ырыа-тойук аргыстаах Зинаида Иванова 2022 сыллаах “Золотоая Леди”эбээлэр күрэхтэригэр кыттыбыт бэтэрээннэр ааттарыттан Василиса Егоровнаны кэрэтик махтана санаан “Сардаана” ансаамбылын үҥкүүһүттэригэр бэлэх уунна. Бу күн биһиги куонкурус балаһыанньатыгар сөп түбэһиннэрэн дойдубут норуоттарын үҥкүүлэриттэн корякскай, чукотскай, тувинскай, уйгурскай үҥкүүлэри астына көрдүбүт. Бастакы үҥкүү куонкуруһун кыттыылаахтара бука бары хаартыскаҕа түһүүнэн бу дьоро түгэни үйэтитэн хааллылар.
Экспозиция арылынна
Дьүүллүүр сүбэ кыайыылаахтар ааттарын быһаарар түгэнигэр эбиэт кэнниттэн “Саргы түһүлгэтэ” мааны көстүүнэйин саалатыгар Василиса Романоваҕа аналлаах экспозиция-быыстапка сиэри-туому толорон үөрүүлээх арыллыыта буолбутун ахтан аһарыым.
Нөмүгүттэн айылҕаттан айдарыылаах Надежда Егорова кэлэн арчылаан, кэрэ тыллары алтыһан ааспыт ытык киһитигэр анаата. ”Эркээнилэр” минньигэс саха алаадьытынан мустубут ыалдьыттары күндүлээтилэр. Силикпитин ситэрэн Покровскай куораппыт баһылыга Виктор Константинов тыл эттэ, Василиса Егоровна олорон ааспыт олоҕор сүгүрүйдэ, кэлэр көлүөнэлэргэ кини сырдык аата ааттана, тэрийбит ансаамбыла салгыы улууспут визитнэй карточката буола турарыгар, саҥа көлүөнэ ыччаппытын үҥкүү дьоһун эйгэтигэр угуйа турарыгар баҕа санаатын тириэртэ. Истиҥ тыллары “Саргы түһүлгэтэ” култуура дыбарыаһын хаһаайката Лариса Владимирова эттэ, бары кыттааччыларга, оҕолор төрөппүттэригэр, спонсордарга махтанна уонна бу саҥа арыллыбыт экспозиция, аныгы технологияларынан оҥоһуллубутун, онон ахтыылары билигин даҕаны биэрэн ытык киһибитин кэриэстээн үйэлэргэ суруйан хаалларан киллэртэрэр, хаартыска, видео бэлэхтиир кыахтааххыт диэн ыҥырыылаах буолла.
Ааҕааччыларбытыгар тириэрдэбин – экспозицияны кэлэн көрүҥ диэн. Манна Василиса Егоровнабыт үҥкүүгэ, Хаҥалаһыгар анаабыт олоҕо, аан дойду араас муннуктарыгар сылдьан кэлэктиибин, искусство деятеллэрин кытары түһүспүт хаартыскалара, куонкурустарга ситиһиилэнэн ылбыт наҕараадалара, бэлэмнээн таһаартарбыт кинигэлэрэ, дүҥүрүгэр тиийэ тутта сылдьыбыт мала-сала о.д.а. түмүллүбүтүн кэлэн көрүөххүтүн, билсиэххитин, үтүө тылларынан махтана ахтан аһарыаххытын син. Үтүө киһи аата умнуллубат.
Людмила Аммосова, ааптар хаартыскаҥа, видеоҕа түһэриилэрэ: https://t.me/gazetahangalas/52559
