Меценат С.П. Барашков 150 сылыгар
Хачыкаакка прогрессивнай өйдөөх санаалаах Семен Петрович Барашков доҕоро, эмиэ кини курдук биллэр атыыһыт, меценат Василий Семенович Артамонов-Бааһай олоро сылдьыбыта. Урукку кэмҥэ Киримҥэ тутуллан турбут кини дьиэтэ кэлин Хачыкаакка көһөрүллэн «Өктөөп 50 сыла» сопхуос хонтуората буолан турбута билигин да баар.
Бу дьиэҕэ саха суруйааччыта, биллиилээх учуонайа Алексей Кулаковскай Семен Петрович Барашковы кытары элбэхтик сылдьыбыта. Оччолорго кини маннааҕы оскуолаҕа учууталлыыра. Дьиэ чахчы Василий Артамонов киэнэ буоларын кини кэргэнэ Анна Петровна Артамонова (Киприянова) 1978 сыллаахха Хачыкаакка миэхэ ыалдьыттыы кэлэ сылдьан кэпсээбитэ. Бу мындыр өйдөөх саха дьахтара аҕам Данил Васильевич Киприянов чугас аймаҕа этэ. Кини оччолорго Намҥа өр сыл прокурорунан үлэлээбит соҕотох уолун П.В. Артамоновы кытары олороро.
Анна Петровна, уола даҕаны репрессияҕа түбэспит кэргэнин, аҕатын туһунан ахтыбат буолаллара.
Анна Петровна ол күн хонон туран баран «Дьиэбин баран көрүөм» диэбитэ. Аа-дьуо хааман тиийдибит, киирэн кэрийэн көрдүбүт. Онно ыалдьытым ааны кэлэн тутан көрдө уонна «Ааным бэйэтинэн турар эбит. Мин бу дьиэҕэ элбэх киһини көрсүбүт дьахтарбын, аатырбыт Кулаковскайы хаста да чэйдэппитим, Сэмэнниин (Барашков С.П.) кэлэ сылдьар этилэр»диэтэ.
Оччолорго Анна Петровна 86 саастааҕа, өйө-санаата чөл этэ. Бу кини тиһэх сырыыта буолбута. Кэлэн бары аймахтарын көрсөн кэпсэтэн барбыта. Онон бу дьиэни история нэһилиэстибэтин быһыытынан хаалларан түмэл оҥоруохха наада. Манна үгүс биллиилээх дьон сылдьыбыттар, үлэлээбиттэр, ол иһигэр Василий Артамонов-Бааһай, эмиэ олоҕу саҥалыы көрүүлээх дьоһун биир дойдулаахпыт. Ытык дьоммут умнуллуо суохтаахтар.
Любовь КИПРИЯНОВА, Хачыкаат нэһилиэгин Бочуоттаах гражданина
(С.П. Барашков төрөөбүтэ 150 сылыгар аналлаах Хачыкаакка муус устар 3 күнүгэр ыытыллыбыт конференцияҕа дакылаатыттан).
На верхнем ряду дочь С.П. Барашкова А.С. Барашкова.
Остатки мельницы на Булуус
С. П. Барашков с сыном.
Сепаратор С. П. Барашкова на молочной ферме в Качикатцах.
Фото: Киприянов Д.В. аймахтарын кытта. Анна Петровна вторая слева в первом ряду.