Өрөспүүбүлүкэ күнүн көрсө
Быйылгы Култуура сылыгар уонна Саха Өрөспүүбүлүкэтин күнүгэр сөп түбэһиннэрэн Покровскайга Серго Орджоникидзе түмэл-дьиэтигэр улууспут киинин үс тэрилтэтин үлэһиттэрэ кыттыылаах «Музейный квиз» интеллектуальнай оонньуу ыытылынна.
Бу өй күрэҕэ төрөөбүт тылбыт баайын, саха норуотун историятын, култууратын, үгэстэрин билиигэ тургутуу быһыытынан буолла. Манна кыраайы үөрэтээччилэр, бэтэрээннэр «Дьулуур» диэн хамаанда тэринэн, «Илгэ» —Хаҥаластааҕы үөрэх управлениетын, «Харысхал» — Хаҥалас улууһун нэһилиэнньэ социальнай көмүскэлин управлениетын хамаандалара өй күрэҕэр кииристилэр. Тэрээһин бэрт кэрэхсэбиллээхтик уонна тыҥааһыннаахтык ааста. Кыттааччылар араас боппуруостарга хоруйдаан дириҥ билиилэрин көрдөрдүлэр.
Оонньуу түмүгүнэн муҥур кыайыылаах аатын «Харысхал» Хаҥалас улууһун нэһилиэнньэ социальнай көмүскэлин управлениетын хамаандата сүктэ. Кинилэргэ сүрүн бириис быһыытынан А.Е. Кулаковскай-Өксөкүлээх Өлөксөй «Письмо якутской интеллигенции» кинигэтэ туттарылынна.
Маннык тэрээһиннэр дьону билиигэ-көрүүгэ угуйар, саха тылын уонна култууратын сайыннарар аналлаахтар. Хаҥалас түмэлэ инникитин да өй оонньууларын тэрилтэлэргэ анаан ыытыаҕа, онон көхтөөх кыттыыны ыларгытыгар ыҥырабыт!
Елена Филиппова, Г.В. Ксенофонтов аат. Кыраайы үөрэтэр түмэл аҕа научнай үлэһитэ.
