Бу күннэргэ Москваҕа “Душа России” норуоттар икки ардыларынааҕы кырадаһынтан иистэнии фестиваля ыытыллар. Манна Саха сириттэн «Үктэл» айар устуудьуйа уран иистэнньэҥэ, норуот маастара Ульяна Миронова уонна Нөмүгүттэн «Эркээни утума» түмсүү салайааччыта Анастасия Гуляева норуот маастара Людмила Жиркова салалтатынан кытта сылдьаллар.
Биир дойдулаахпыт Анастасия Гуляева бу улахан тэрээһиҥҥэ кыттыбытын туһунан санаатын үллэһиннэ.
— Фестиваль «Гостиный двор» быыстапкалыыр кииҥҥэ ыытылынна. Манна Корея, Индия, Индонезия, Панама, Перу, Шри-Ланка, Судан, Нигерии, Япония уо.д. а. дойдулартан кырадаһын ииһин сэргиир-сэҥээрэр, тарҕатар талааннаах дьон кэлэн кытта сылдьаллар. Мин «Ткань и слово» быыстапкаҕа өрөспүүбүлүкэбит араас улуустарыттан хомуллубут 100 паннону илдьэн билиһиннэрдим. Ол иһигэр «Эркээни утума» түмсүүбүт аҕыс иистэнньэҥин саха өс хоһоонунан оҥорбут паннолара киэҥ көрүүгэ туруорулуннулар. Маны сэргэ, «Үктэл»устуудьуйа кырадаһынтан, кыбытык, аппликация технологиянан тигиллибит түөрт кэллиэксийэтинэн кыттан үгүс дьон сэҥээриитин ылла. Көрөөччүлэр сахалыы ииһи сөҕөн-махтайан, астынан көрдүлэр-иһиттилэр. Биһиги өссө «Лоскутные идеи и затеи» диэн темалаах маастар-кылаас ыыттыбыт, манна эмиэ үөрэнээччилэр астына-дуоһуйа кытыннылар. Бу курдук үрдүк таһымнаах бырайыакка Саха сирин билиһиннэриигэ, омукпут төрүт култууратын тарҕатыыга кыттыбыппытынан киэн туттабыт, — диэтэ талба талаан Анастасия Николаевна.
Ольга Гермогенова.
Хаартыскалары, видеоны Анастасия Гуляева тиксэрдэ.
