Социальнай хантыраак
Кэнники кэмҥэ үлэтэ суох дьон, кыра дохуоттаах, элбэх оҕолоох ыал бэйэ дьыалатын тэринэллэригэр бастакы хардыыларын оҥостоллоругар социальнай көмүскэл управлениетын нөҥүө социальнай хантыраак баттаһан туһанар буоллулар. Дохуот аахсан киһи бэйэтэ кыаҕынан үлэлииригэр маннык судаарыстыбаттан көрүллэр көмө олус наадалааҕын туһаммыт эрэ дьон бары туоһулуур. Балыксыкка күөгүнү туттарбыт курдук, маннык өйөбүлү көдьүүстээхтик туһаныахха эрэ наада.
Булгунньахтаахха түөрт оҕолоох улахан ыал ийэтэ ОльгаАлексеева былырыын Хаҥалас улууһун нэһилиэнньэ социальнай көмүскэлин управлениетын кытта 350 тыһыынча солкуобай суумалаах социальнай хантыраак баттаһан күн бүгүн дьиэтигэр дьоҕус бэкээринэ арынан үлэлэтэр.
— Мин бэйэм бастакы идэбинэн технологпын, бурдук ас астыырбын туохтааҕар да сөбүлүүбүн. Ааспыт сыл муус устарыгар сүрэхпэр ордук чугас дьарык диэммин мини-бэкээринэ үлэлэтиэһикпин диэн бизнес-былаан суруйан бэлэмнээбитим уонна бу өйөбүл бырагырааматыгар кыттарга быһаарыммытым. Урут бэкээринэлээх этибит, кэнники сабыллыбыта, ол да буоллар бурдук ас астыыр баҕа санаам мэлдьи баара. Аны туран, кэргэним эбээтэ уонна ийэтэ эмиэ уруккута биэкэрдэр, онон кинилэр үөрэтэн-такайан, сүбэлээн-амалаан, көмөлөһөн килиэби, бурдук ас арааһын астыыр буоллум. Өйөбүл харчыбынан бастатан туран туттар тэрилбин хааччыммытым — конвекционнай оһох, тиэстэ мэһийэр тэрил, тиэстэ таһаарар, анал температураны тутар расстоечнай ыскаап, электроннай ыйааһын атыыласпытым, — диэн бэйэ дьарыгын хайдах саҕалаабытын Ольга кэпсиир.
Билигин Алексеевтар дьиэлэрэ бурдук ас минньигэс, дыргыл сытынан туолар. Ольга сатабыла улаатан, сакаас элбээн килиэптэн ураты аны булочка арааһын, батон, бэрэски хас да көрүҥүн, минньигэс бөрүөктэри уо.д.а.астыыр. Бурдук аһын олохтоох маҕаһыыннарга туттарар. Дьон-сэргэ Ольга илиититтэн тахсыбыт сибиэһэй, минньигэс, иҥэмтиэлээх бэйэ килиэбин, бурдук аһын сөбүлээннэр сакаастаан ыла тураллар. Бородууксуйам хамаҕатык атыыга барар, түргэнник бүтэр диэн асчыт үөрэ кэпсиир.
— Сайынын туристар, дэриэбинэҕэ сайылыы кэлээччи дьон элбээтэҕинэ атыым өссө элбиир. Билигин оскуолаҕа үлэлиир буоламмын күн аайы астаммаппын. Түөрт оҕолоох, устудьуоннаах ыалга эбии дохуот киирэрэ олус үчүгэй. Соцхантыраак диэн баара наһаа туһалаах дии саныыбын, киһи бэйэтин баҕатын толороругар, дьоҥҥо наадалаах дьыаланы арыйарыгар олус көмөлөөх. Бу өйөбүлү туһанаммын инникибэр эрэллээх, тирэхтээх курдукпун. Хаһан баҕарар бурдук аспын астаан, атыылаан, үлэлээх буолабын. Сарсыҥҥы күҥҥэ эрэллээх киһи дьоллоох, нус-хас олохтоох буоларын бэйэбинэн биллим. Хаҥаластааҕы социальнай көмүскэл салалтатыгар уонна нэһилиэгим дьаһалтатын испэсэлиистэригэр кэмигэр сөптөөх сүбэ-ама биэрэн көмөлөспүттэригэр махталым муҥура суох, — диэтэ Ольга Владимировна.
Ольга ГЕРМОГЕНОВА.
Хаартыскалар Ольга АЛЕКСЕЕВА тус архыыбыттан.
