Эркээни ыһыаҕа
Эркээни улуу туонатыгар ыытыллыбыт ыһыахха “Сомоҕолоһуу оһуохайын” күрэҕэр 18 киһи кытынна, ол иһигэр биэс оҕо. Күрэх оһуохайдьыттар түөрт саастарынан арахсан ыытылынна.
Күрэх түмүгүнэн оһуохайдьыттарбыт анал ааттарынан бэлиэтэннилэр. Ол курдук, Мохсоҕоллоохтон Мария Нератова “Дархан этээччи” ааты ылан ДНС маҕаһыынтан 20 000 солк. сертификаты тутта. Тиит Эбэттэн Эрик Егоров “Уус уран тыллаах оһуохайдьыт” ааттанна, 15000 солк. “Фаворит” авто-оскуола сертификатынан бэлиэтэннэ. Хачыкааттан Людмила Максимова “Кылыһахтаах куоластаах этээччи” ааттанан Күрүлүүргэ сынньана барарга 15000-лаах сертификаттанна. Төхтүртэн Дарья Захарова “Киэҥ түһүлгэлээх оһуохайдьыт” буолла, “Нараада” 15000 солк. сертификатынан наҕараадаланна. Зинаида Иванова “Кылыһахтаах куоластаах этээччи”, Булгунньахтаахтан Ньургун Давыдов “Тэтимнээх оһуохайдьыт”, Улахан Аантан Ньургуйаана Третьякова “Кылыһахтаах куоластаах этээччи” бэлиэтэнэн “Нараада” турбаза анал сертификаттарын туттулар. Покровскайтан Сайаан Бардеев “Кылыһахтаах куоластаах этээччи” ( ону сэргэ “Бастыҥ кыначчыт” буолан 1000 солк. уу харчынан), Улахан Аантан Дархан Харитонов “Чуор куоластаах этээччи” анал ааттанан “Уруу” ювелирнай хампаанньанан бэлиэтэннилэр. Хачыкааттан Дима Сулейманов “Эдэр кэскиллээх этээччи”, Өктөмтөн Карина Батюшкина, Улахан Аантан Богдан Слепцов “Саҥа саҕалааччы” анал ааттары ылан “Нараадаттан” сертификаттанан бардылар. Дьокуускайтан Людмила Кривошапкина “Тэтимнээх оһуохайдьыт”, Покровскайтан Анастасия Ющенко “Чуор куоластаах этээччи” “ Уруу» хампаанньа үрүҥ көмүс бэлэхтэрин туттулар.
Эркээни ыһыаҕын оһуохай күрэҕин спонсордарынан буоллулар “Уруу” ювелирнай, “Күрүлүүр” туристическай хампаанньалар, “Злато» көмүс маҕаһыына, “Фаворит” авто-оскуола, “Нараада” турбаза.
Ыһыахпытыгар Саха өрөспүүбүлүкэтин “Оһуохай» түмсүүтүн дархан этээччилэрэ Валентин Хорулов, Чурапчыттан Данил Пестряков сүр көтөҕүү оһуохайыгар кыттан сүргэбитин көтөхтүлэр, элбэх оҕолоох дьиэ кэргэн аҕа баһылыгар, дархан оһуохайдьыппытыгар Ньургун Давыдовка Гиннес оһуохайын хаартыскатын куоппуйатын үөрүүлээх быһыыга-майгыга туттардылар, тэрийээччилэргэ, дьүүллүүр сүбэҕэ махтал, хайҕабыл тылларын эттилэр.
Хаҥалас улууһун дьаһалтата уонна улууспут култууратын үлэһиттэрэ ыһыах сүрүн тэрийээччилэрин ааттарыттан бары кыттааччыларбытыгар, спонсордарбытыгар барҕа махталбытын тиэрдэбит.
Лидия Харитонова, оһуохай күрэһин сүбэтин бэрэссэдээтэлэ.
