Култуура сылыгар
Үгэскэ киирбит норуот бырааһынньыга быйыл этно-култуура өрөспүүбүлүкэтээҕи фестивалын чэрчитинэн саҥа тутуллубут Ариносовтар турбаазаларын сиригэр-уотугар бэрт тэрээһиннээхтик ыытылынна.
Хаҥаластан уонна Дьокуускайтан фольклорнай ансаамбыллар, дьаам дьоно мустан ахтылҕаннарын таһааран, ыччаттарыгар төрүттэрин үгэстэрин, ырыаларын, үҥкүүлэрин билиһиннэрэн төнүннүлэр.
— Быйыл бу фестиваль “Великий культурный путь: Сибирский тракт в памяти поколений” диэн регионнар икки ардыларынааҕы бырайыактарын чэрчитинэн ыытылынна. Бу тэрээһин Россия култуура эйгэтигэр көҕүлээһиннэрин Президенскэй пуондатын кыайыылааҕын «Милосердие” регионнааҕы общественнай тэрилтэ иитинэн барда. Санатан эттэххэ, тэрээһин бастакы түһүмэҕэ Уралга Свердловскай уобаласка буолан ааспыта. Манна фестиваль былыргы дьаам суолун омоонноро, араас сиэдэрэй тутуулара ордон хаалбыт сирдэригэр тэриллибит буоллаҕына, биһиэхэ, Саха сиригэр, дьиҥнээх дьаам сыдьааннарын култууратын, үгэстэрин билиҥҥэ диэри тута сылдьар дьон мустан ыллаан, пляскалаан, хоробуоттаан, аһын-үөлүн, оонньууларын билсэн барбыта хайҕаллаах. Еланкабыт күнэ биһиги саҥа тэристибит турбаазабытыгар ыытыллыбыта үтүө өйдөбүлү хаалларбытыттан астынабын, — диэтэ “Тоҕус-туур” комплекс хаһаайына Сергей Ариносов.
Еланка күнүн Мохсоҕоллоохтон, Булгунньахтаахтан, Бэстээхтэн, Покровскайтан уонна Дьокуускайтан фольклорнай ансаамбыллара кэлэн киэргэттилэр, хаһаайыттар дьаамсык хааһытынан, сибиэһэй балык миининэн күндүлээтилэр, сиэргэ-туомҥа туттуллар үгэскэ кубулуйбут куукуланы оҥорууга маастар-кылаас ыытыллыбыта сонун буолла.
Людмила Мордовская
(Сергей Ариносов хаартыскаҕа түһэриитэ уонна видеоҕа устуута)
