Эрдэ биллэрбиппит курдук, I Дьөппөн нэһилиэгэр Вера уонна Спиридон Яндреевтар1986 сыллаахха тутуллубут, үрдэ суулла турар эргэ хотонноохтор. Кыстыкка киирэргэ хотоннорун өрөмүөннүүргэ күүс-көмө буолалларыгар биир дойдулаахтарыгар, түмсүүлээх нэһилиэктэрин дьонугар олус эрэммиттэрэ. Балаҕан ыйын 26-27 күннэригэр хотон өрөмүөнүгэр күргүөмнээх субуотунньук тэрилиннэ.
I Дьөппөн нэһилиэгин баһылыга Андрей Яковлев маннык иһитиннэрдэ:
— Бу икки күннээх субуотунньукка нэһилиэк 30 эр дьоно ис санааларыттан кэлэн үлэлээтилэр. Өрөмүөн үлэтигэр бэлэмнэниигэ ким эрэ туттар матырыйаалынан, сорохтор пилорамаҕа мас хайыттаран улахан көмөнү оҥорбуттара. Хотон үөһэ сис мастара олох мөлтөх туруктаахтарын көрөммүт уларыттыбыт уонна үрдүгэр саҥа мастары тэлгэттибит. Үрдүгэр буор кутууга улуус дьаһалтатыттан улахан тыраахтар кэлэн абыраата. Субуотунньукка улууспут тыатын хаһаайыстыбатын салайааччыта Александр Константинов быһаччы миэстэтигэр үлэлээн күүс-көмө буолбута. «Хаҥалас Агрохолдинг» ТХППК салайааччыта, Ил Түмэн дьокутаата Тихон Скрябин хас биирдии субуотунньукка үлэлээбит дьоҥҥо барыларыгар сүөгэй утары ууммута уонна Яндреевтарга уу харчынан 50 тыҺ. солк.көмө оҥорбута. Үлэ быстыбакка тэтимнээхтик барарыгар нэһилиэкпит кэрэ аҥаардара минньигэс тотоойу аһынан үлэ дьонун күндүлээтилэр. Торумнаммыт үлэ толору туолла, — диэн үтүө сонунун үөрэ-көтө кэпсээтэ Андрей Андреевич.
I Дьөппөн нэһилиэгин олохтоохторо үтүө дьыала туһугар хамсаннылар, сыалларын ситтилэр. Эдэр дьон Яндреевтар хотонноро быйылгы кыстыкка бэлэм буолла. Этэргэ дылы, уулаах балык быстыбат, ойуурдаах куобах охтубат, дьонноох киһи тутайбат. Онон Вера уонна Спиридон Яндреевтар биир дойдулаахтарыгар махталлара муҥура суох.
Уйбаан УЙГУУРАП,
хаартыскалар уонна видеолар I Дьөппөн нэһилиэгин дьаһалтатын архыыбыттан туһанылыннылар.