Билэргит курдук, күндү ааҕааччыларбыт, кэлэр 2027 сылга бэчээккэ сурутуу саҕаланна, ол иһигэр улууспут сахалыы тыллаах “Хаҥалас” хаһыатыгар. Киэҥ сирдээх-уоттаах Саха сирэ олохтоох иһитиннэрэр көрдөрөр средстволартан аккаастана илигэ олохпут туруктаах буоларын бигэргэтэр. Биһиги судаарыстыбаннай дэнэр, ити иһигэр автономнай тутуллаах улуустааҕы хаһыаттарбыт бу дойдубутугар чэпчэкитэ суох быһыыга-майгы үөскээн турдаҕына, кэлэр сылга тахса туруохтарын өрөспүүбүлүкэбит салалтата мэктиэлиир, бэчээккэ сурутуу барар.
86 хаарыгар үктэммит “Хаҥалас” хаһыаппыт сахалыы тылынан нэдиэлэҕэ биирдэ да буоллар, социальнай ситимнэригэр суруйууларын эбинэн, 2027 сылга тахсарын сурутуу биллэриллибитэ бигэргэтэр. Бэчээккэ сурутуу биллэриллээтин кытары үгэс быһыытынан, биир бастакынан Мохсоҕоллоохтооҕу “Якутцемент” АО-ны кытары бэйэтин бэтэрээннэригэр үөрэҕирии үлэһиттэрин идэлээх сойуустарын улуустааҕы кэмитиэтин тэрилтэлэрэ көхтөөхтүк кыттан 220 хаһыаты, ол иһигэр сахалыы тыллаах “Хаҥаласпытыгар” 164 экземпляры ытыктабыллаах бэтэрээннэригэр сурутан улахан кылааты киллэрдэ.
“Тэрилтэ — салайааччытынан” диэн бэргэн этии баар. Бу элбэх чилиэннээх идэлээх, ол иһигэр эмиэ да үгүс тус кыһалҕалаах, сойууһу үлэ бэтэрээнэ, РФ үөрэхтээһин эйгэтин бочуоттаах үлэһитэ, Покровскай куорат Бочуоттаах олохтооҕо, Бангладешка бойобуой дьайыылар кыттыылаахтара Валерий Романович Семенов салайар. Сэрии диэн тугун билбит киһи бэчээт суолтатын сыаналыыр, хаһыс да сылын биир идэлээхтэригэр улууспут хаһыаттарын сурутууну иилиир-саҕалыыр, дьоно-сэргэтэ улууска туох буолар турарын билэригэр олук уурар. Ытыктыыр киһибитин сирэй көрсөн дьэ туох санааттан бу эппиэттээх, туһугар түбүктээх үлэни тэрийдиҥ диэн ыйыталастым.
— Бу мин эрэ өҥөм буолбатах, бу тэрилтэм бэйэ хаһыатыгар эрэлэ, кырдьыктаах информацияны ыларга дьулуһуута буолар, — диэтэ идэлээх сойуус тумус туттар киһитэ Валерий Романович, — Улууспут хаһыаттара биһиги эйгэбит олоҕун, кыһалҕатын, ситиһиилэрин, ыра санааларын толору сырдатан кэллилэр, нэһилиэнньэни, үөрэх кыһаларын кытары үлэбитигэр, саҥаны киллэрии уопутун тарҕатыыга күүс-көмө буолаллар. Онон үлэһиттэрбит салгыы сырдыгы, билиини тарҕатыыга, үйэлээх сыаннастары өрө тутууга бииргэ буолууга дьулуһан сурутууга көх-нэм буолбуттарыттан астынабын, үөрэх кыһаларын профсоюзнай тэрилтэлэригэр, үп-харчы боппуруоһун кыахтаахтык быһаарар улахан уопуттаах биир идэлээхпэр Александра Александровна Петроваҕа махтанабын. Хаһыаттарбыт баар буоллуннар, кырдьыгы кэпсии, саҥаны тарҕата турдуннар!
Валерий Романович дойдутун дьоно ордук сахалыы тыллаах хаһыакка хото суруттарбыттарыттан эмиэ үөрэр. Ол аата кинилэр саха тыла, төрүт үгэстэрбит салгыы сайдалларыгар көмөлөһөллөрүн этэр. Ордук элбэх сахалыы саҥалаах хаһыаты булгунньахтаахтар, өктөмнөр, дьуралар, төхтүрдэр, үөдэйдэр, тиит-арыылар, чкаловтар суруттарбыттарын ахтан аһарда.
Таарыччы эттэххэ, Валерий Семенов, төрүттэрэ Бүлүүттэн, Өлүөхүмэттэн, бэйэтэ Горнайтан да буоллар, Хаҥалаһы дойду оҥостон Саха госуниверситетын биолого-географическай факультетын 1978 сыллаахха бүтэрэн ананан кэлиэҕиттэн ыла сөбүлээн үлэлии-хамсыы сылдьар. Географ идэлээҕинэн Покровскай 4 нүөмэрдээх оскуолатыгар 40-тан тахса сыл устата учууталлаата. Туризмҥа кылааһы таһынан үгүс үлэни ыытан, үөрэнээччилэрин араас таһымнаах сүлүөттэргэ, походтарга, күрэхтэһиилэргэ, интерактивнай оонньууларга, кыраайы үөрэтии тэрээһиннэригэр кытыннаран ситиһии кынаттанан кэлбит, оҕо кутун туппут үтүөкэннээх педагог буолар. Кэлин сылларга салайар идэлээх сойууһун тэрилтэтэ өрүү инники күөҥҥэ.
Онон, Валерий Романовичтаах үтүө холорбурдарын батыһыҥ, сурутууга көхтөөхтүк кыттыҥ!
Людмила Аммосова, ааптар хаартыскаҕа түһэриитэ.