#Барыбииргэ
«Аҕа дойдуну көмүскээччилэр» пуонда Саха сиринээҕи филиалын үлэһиттэрэ Анал байыаннай дьайыы кыттыылаахтарыгар, кинилэр дьиэ кэргэттэригэр тиһигин быспакка көмө оҥороллор. Биһиги улууспутугар бу пуонда социальнай координаторынан 2023 сылтан Екатерина Перевалова үлэлиир. Кини идэтигэр олус бэриниилээхтик, ис сүрэҕиттэн кыһаллан дьону-сэргэни, бэтэрээннэри кытта ылсан үлэлиирин улуус таһымнаах араас мунньахтарга, көрсүһүүлэргэ мэлдьи бэлиэтии көрөбүн.
Бу кэм устата Екатерина Ивановна бэрт элбэх биир дойдулаахпытыгар сулууспалаан кэлэн эйэлээх олоххо төннөллөрүгэр өйөбүл-тирэх, күүс-көмө буолла. Кини быһаччы сүүрэн-көтөн, наадалаах докумуону сырсан, кэпсэтии ыытан, ыйан-кэрдэн байыаннай дьайыы кыттыылаахтарын, дьиэ кэргэттэрин, төрөппүттэрин бары кыһалҕаларын тэҥҥэ быһаарсар.
Екатерина көмөтүнэн социализацияны ситиһиилээхтик ааспыт дьонтон биирдэстэрэ Гаврил Захаров буолар. Анал байыаннай дьайыы саҕаланыытыгар Гаврил дойду көмүскэлигэр туруммута. Онно сылдьан ыараханнык бааһыран төннүбүтэ. Уһун реабилитацияны, эмтэниини ааспыт эдэр киһи салгыы хайдах-туох дьаһанарын сүбэлэттэрэ «Аҕа дойдуну көмүскээччилэр» пуонда филиалыгар тиийбитэ.
— Гаврил миэхэ кэлээтин кытта, бастатан туран, бэтэрээҥҥэ көрүллүөхтээх өйөбүл миэрэлэри туһанарыгар ирдэнэр докумуоннары хомуйбуппут. Доруобуйатын чөлүгэр түһэрдин диэн Россия Социальнай пуондатын нөҥүө санаторнай-курортнай эмтэниини ааспыта. Кини спордунан дьарыктанарын, оҕону, ыччаты патриотическай тыыҥҥа иитэр баҕалааҕын билэммин улууска буолар тэрээһиннэргэ кытыннарбытым. Билигин Гаврил Захаров үөрэх тэрилтэлэригэр сылдьан «Эр санаа» уруоктарын ыытар, пуондабыт бары тэрээһиннэригэр көхтөөхтүк кыттар актыбыыстарбытыттан биирдэстэрэ, — диэн Екатерина киэн тутта кэпсээтэ.
Патриотическай үлэни таһынан Гаврил улуус, өрөспүүбүлүкэ күрэхтэһиилэригэр кыттар ситиһиилээх спортсмен. Кини доруобуйаларынан хаарчахтаах дьон спортка бэйэлэрин булуналларыгар холобур, сирдьит буолар киһи.
Бу күһүҥҥүттэн Гаврил Захаров Хаҥалас улууһун инбэлиттэрин уопсастыбатын бэрэссэдээтэлин солбуйааччытынан үлэлээн саҕалаата. Онон кини бэйэтин холобурунан дьону саҥаттан саҥа ситиһиигэ кынаттыыр, бэйэҕэ эрэллээх буоларга үөрэтэр.
Ольга Гермогенова.
Хаартыскалары социальнай координатор Екатерина Перевалова тиксэрдэ.
