Сахабыт сирин хас биирдии оскуолаларыгар оҕолор хамсааһыннара киэҥ үлэни ыытар. Бу күннэргэ С.П. Ефремов аатынан Булгунньахтаах орто оскуолатыгар тэриллибит «Бары бииргэ көҕүлүүбүт» диэн III коммунарскай хомуурга улууспут оскуолаларыттан барыта сэттэ хамаанда кытынна. Оҕолор уопсастыбаннай түмсүүлэрин дэлэгээссийэлэрэ бэйэлэрин хамаандаларын тэтимнээх музыка доҕуһуоллаах, эрчимнээхтик билиһиннэрдилэр.
— Биһиги бу тэрээһиммит сыала-соруга, бастатан туран, оҕолору түмүү, ону сэргэ оҕолорго улуус, өрөспүүбүлүкэ уонна федеральнай таһымҥа оҕо хамсааһына хайдах үлэлии турарын көрдөрүөхпүтүн наада. «Бары бииргэ көҕүлүүбүт» диэн аатыгар баарын курдук, оҕо бэйэтэ аһыллан санаатын хото этэ, билиитин-көрүүтүн тиэрдэ үөрэнэригэрсоруктанабыт. Бу таһымнаах тэрээһиммитигэр сэттэ оскуолаттан оҕолор бастакы сүһүөх хамсааһыннарын кыттыылаахтара кэллилэр. «Дархан» диэн Хаҥалас улууһун устудьуоннарын түмсүүтүттэн ыччаттар кэлэн үтүө көмөһүт буоллулар. Кинилэр өссө Анал байыаннай дьайыыга сылдьар буойуттардаах ыалларга көмөлөстүлэр. «Бастакылар хамсааһыннара» өрөспүүбүлүкэтээҕи холбоһукиспэсэлиистэрэ оҕолор хамсааһыннарын салайааччыларын, оскуолалар дириэктэрдэрин сүбэһиттэрин кытта бииргэ үлэлэстилэр. Москва, Санкт-Петербург курдук дойдубут киин куораттарыгар үөрэнэн кэлэн бараннар оҕолорбутугар, үлэһиттэрбитигэр билиилэрин тиэртилэр. Маны сэргэ, оҕону сынньатар уонна чэбдигирдэр «Бэс чагда» Киин испэсэлиистэрэ оҕолору кытта үлэлэстилэр. Кинилэр быйыл федеральнай бырагыраама гранын кыайаннар «Тайны космоса в твоих руках» бырагырааманан үлэлэһэ сылдьаллар. Оҕолор манна дьарыктанан федеральнай таһымнаах туоһу суруктары ылыахтара, б инникитин үөрэххэ киирэллэригэр, бэйэлэрин тус портфолиоларыгар эбии буолар, — диэтэ Булгунньахтаах оскуолатын дириэктэрэ Максим Спиридонов.
Тэрээһин кэмигэр оҕолор бастакы сүһүөх хамсааһыннарын салайааччыларыгар, оскуола дириэктэрдэрин сүбэһиттэригэр «Көхтөөх буолуу сирдьитэ: идиэйэттэн түгэҥҥэ диэри» диэн семинар-практикуму Дьокуускай куораттан «Оҕо саас сирдьиттэрэ» барыл сүрүннээччитэ Виктория Олесова тэрийдэ. Оттон оҕолор этэрээттэргэ арахсан станцияларынан оонньууларга кытыннылар. Коммунарскай хомуур түмүгүнэн көхтөөх оҕолор өссө арыллан, сайдан дойдуларыгар туһалаах дьон буолалларыгар дьоһуннаах хардыыны оҥордулар.
Уйбаан УЙГУУРАП,
Ааптар хаартыскаҕа түһэриитэ уонна видеоҕа устуута: https://max.ru/channel_Hangalas
