Дойдубут айылҕата күһүнүн төһө да уһаттар, кэлэр кэм ыллар ылан, кыһыҥҥы хонуктар буоллулар. Күөллэр, үрэхтэр мууһунан бүрүллэн тоҥон дьон-сэргэ кыстыгар иһэр мууһун хааччынар.
Төхтүр нэһилиэгин дьаһалтата баһылык Кэскил Багдарыын салалтатынан сыллата аҕам саастаах дьоҥҥо, ону сэргэ анал байыаннай дьайыыга сылдьар ыччаттарбыт төрөппүттэригэр муус ылан дьиэлэригэр таһан биэрэр үтүө үгэстээх. Маннык субуотунньукка нэһилиэк күүстээх аҥардара ким бириэмэлээҕинэн эмиэ киирэн көмөлөһөллөрө махталлаах. Бу күннэргэ уолаттар күргүөмүнэн үлэлээн, ыраас мууһу сылбырҕатык бэлэмнээн икки күн устата 30-н тахса ыалга тиэйэн тиксэрдилэр.
Саха былыргыттан илдьэ кэлбит үгэһин эр дьоммут билигинда тутуһар буолан, хотуулаах үлэлэрин түмүгэр кырдьаҕастар махтал тылларын истэн күүстэригэр күүс, сэниэ эбиннилэр. Кинилэр өссө саас аайы бултаабыт кустарыттан аҕам саастаахтарга бэрсэн үөрдэллэр. Бэлиэтээн эттэххэ, Төхтүр орто оскуолатын кэлэктиибэ өрсыл үлэлээбит бэтэрээннэригэр эмиэ муус ылан тиэрдэр үтүө үгэстээх.
Мотрена Ефремова, Төхтүр с.
Хаартыскалары ааптар тиксэрдэ.
