Бэс ыйын 13-14 күннэригэр Саха сиригэр бырааттыы татаар омук бырааһынньыга Сабантуй буолара күүтүллэр.
Бу күннэргэ Сахабыт сиригэр Татарстантан ити федеральнай суолталаах бырааһынньыгы тэрийээччилэр бөлөхтөрө кэлэ сырытта. “Улуус.Медиа» сетевой таһаарыыга Татарстан Өрөспүүбүлүкэтин баһылыга Рустам Минниханов биһиги бырааттыы норуоттар буоларбытын, ону историябыт, былыр-былыргыттан тиийэн кэлбит үгэстэрбит туоһулууллэрин бэлиэтээн туран, доҕордуу сыһыаннарбыт бөҕөргүүрүгэр, бу аан дойдуга глобализация бара турар кэмигэр төрөөбүт тылбытын тутан хааларбытын кэнэҕэски көлүөнэлэрбит эрэйэллэрин этэн туран, икки бырааттыы өрөспүүбүлүкэлэр үрдүкү технологияларга, үөрэҕириигэ уонна култуураҕа бииргэ үлэлэһэллэрэ улахан суолталааҕын бэлиэтээтэ. Кини федеральнай Сабантуй сыллата араас регионнарга ыытылларын эттэ. Бу бэйэтин туһугар атын сирдэргэ олорор биир дойдулаахтарбытын өйөөһүн буолар — дьоммут ханна даҕаны олордоллор дьоһун историялаахтарын, ураты култууралаахтарын билиэхтээхтэр. Татарстаны кытары сибээстэһиилэр IT- уонна автотехникаҕа, нефть бородуукталарын, тыа хаһаайыстыбатын, промышленность рыногар, суудунаны тутууга, балык бородууксуйатын бэлэмнээн таһаарыыга туттуллар тэриллэри оҥорууга о.д.а. бөҕөргүүллэр диэтэ. Татарстан үөрэҕин кыһаларыгар Саха сириттэн 400-тах тахса ыччат үөрэнэ сылдьар, чинчийиигэ, саҥаны айыыга бииргэ үлэлэһэр бырайыактар бааллар.
Сабантуй бастакы күнэ Дьокуускайга араас тэрээһиннэринэн ыытыллыа. “Үс Хатыҥ» этнографическай комплексыгар икки бырааттыы омуктарга былыр-былыргыттан тиийэн кэлбит ат сүүрдүүтэ буолуоҕа.
Ыалдьыттар бу күннэргэ Сабантуй тэрээһиннэрэ хайдах-туох баралларын быһаарыстылар, тэрээһин Хаҥаласка эмиэ ыытылларынан “Орто Дойду» туристко-этнографическай комплекска кытары кэлэ сырыттылар.
Туох былааннанарый?
Казаньтан Дьокуускайга дылы 4400 км. Тэрийээччилэр уонна айар кэлэктииптэр кэлэллэригэр анал авиарейстэри оҥоруохтара. “Татарская усадьба” быыстапка буолуо, манна өрөспүүбүлүкэ араас оройуоннарыттан маастардар уонна ремесленниктэр кэлиэхтэрэ. “Татпотребсоюз” 3000 тахса национальнай бүлүүдэтинэн ыалдьыттарын күндүлүөҕө.
Тустуу кореш көрүҥэр күрэхтэһии ыытыллыа — абсолютнай Боотур Татарстан аатыттан массыына тутуоҕа. Барыта спорт 11 көрүҥэр күрэхтэһиилэр ыытыллыахтара — Россия араас муннуктарыттан кэлбит 500 спортсменнардаах хайаҕа дабайыы, ону сэргэ ох саанан ытыы, мас тардыһыыта о.д.а. болҕомтону тардыа. Биллэн турар, кэнсиэртэр, көрсүһүүлэр буолуохтара (сиһилии кэлин кэп-сиэхпит).
Людмила АММОСОВА,
(“Улуус.Медиа» матырыйаалларынан).