Покровскайдааҕы искусство оскуолатыгар Бастакы Президеммит М.Е. Николаев төрөөбүтэ 88 сылынан Хаҥалас искусство үөрэҕирии кыһаларын холбоһуктаах тэрээһиннэрэ буолан ааста.
Бу «Славим тебя, наш Первый Президент!» диэн дьоһун күн СӨ култууратын үтүөлээх үлэһитэ, М.Е. Николаев «Билиигинэн кыайыаҥ!» анал истипиэндьийэтин хаһаайына, Покровскайдааҕы оҕо ойуулуур-дьүһүннүүр оскуолатын дириэктэрэ Александр Харитонов Президеммит көҕүлээбит «Бары уруһуйдуубут» бырайыагынан быыстапкатынан арылынна. Манна турдулар Валерия Стручкова, Дайаана Семенова, Сахалина Никонова о.д.а. оҕолор уруһуйдара.
Кэлбит ыалдьыттар преподаватель Алексей Андреев сүбэтинэн-аматынан космоска тахсан былаахтары туруорууну дьүһүйэр хартыынатын көмөлөөн астына уруһуйдаатылар.
Ытык биир дойдулаахпытын Михаил Ефимовиһы ахтыы, махтаныы, киниэхэ сүгүрүйүү тэрээһинигэр улууспут баһылыга Сергей Гребнев, норуот суруйааччыта Павел Харитонов-Ойуку, улуус култуураҕа уонна дуһуобунай сайдыыга салайааччыта Фекла Варламова о.д.а. тыл кэрэтин эттилэр. Искусство оскуолаларын үөрэнээччилэрэ, айар кэлэктииптэр музыкальнай нүөмэрдэри бэлэхтээтилэр.
Ол курдук хуор ыллаан ньиргиттэ, уолаттар Президеҥҥэ махтал хоһоонун аахтылар, «Арабеска» өрөспүүбүлүкэтээҕи куонкурус лауреата Яна Андреева, «Шопениана» балеттан прелюдияны толордо, Мохсоҕоллоох оскуолатыттан преподавателлэр Ирина Лиханова, Александр Павлов Виницкэй «Маленькая баллада» айымньытын истээччи болҕомтотугар таһаардылар. Оҕолорбут, кинилэри кэрэҕэ уһуйар педагогтарбыт талааннаахтарын көрөн-истэн итэҕэйдибит – «Музыка барыбытыгар», «Бары уруһуйдуубут» бырайыактар ситиһиилээхтик олоххо киирэллэрин бигэргэттилэр.
Михаил Ефимович
«… Модун санааны үөскэтиэххэйиҥ!
Мин кыайыаҕым диэн,
Мин күүстээхпин диэн,
Мин дьоҕурдаахпын,
Мин сахабын диэн!
Ол буолар күүстээх итэҕэл!
Оннук ыччаттары биһиги иитиэх тустаахпыт!» диэн этиитинэн салайтарыаҕыҥ.
Людмила Аммосова.