Бу историко-патриотическай хамсааһын саҥа түһүмэҕэр үктэннэ. Кыайыы күнүн көрсө биһиги хаһыаппытыгар хаста да бу туһунан таһааран турабыт. Испииһэктэри чуолкайдааһын сүнньүнэн барда. Сотору кэминэн өйдөбүнньүктэри Псковка, Смоленскайга, Калугаҕа, Саха сирин аатыттан тутуохтара, бырайыактара оҥоһуллубутун, турар сирдэрэ быһаарыллыбытын өрөспүүбүлүкэтээҕи хамыыһыйа иһитиннэрдэ.
Быһа холуйан биирдии пааматынньык 2 мөл. солк. буолар. Саха сирин олохтоохторо өйдөбүнньүктэри үбүлээһиҥҥэ кытталлара эрэйиллэр. Инники чуолкайдата ыыппыт испииһэктэригэр уоттаах сэрии кэмигэр охтубуттары кытары аахпыттара 100 киһи буолбут, ол иһигэр Калужскай уобаласка 45, Смоленскайга 26, Псковскайга 29. Өрөспүүбүлүкэтээҕи хамыыһыйа биһигини Хаҥалас уонна Амма улуустарын күүскэ үлэни ыытар бөлөххө киллэрдэ.
Манан сибээстээн оройуон дьаһалтатыгар 9 киһилээх хамыыһыйа тэрилиннэ. Манна култуура, үөрэх, архыып, ыччат политикатыгар дьаһалта салааларыттан, ону сэргэ бэтэрээннэр, общественнай сэбиэттэртэн. «Бастыҥнар хамсааһыннарын» салаатыттан, улуус хаһыатын редакциятыттан киирдилэр. Бастакы тэрээһин мунньах буолла, барыллаан үлэ торумнанна.
«Бастионы памяти» бырайыак Аҕа дойду Улуу сэриитин кэмигэр дойдубут көҥүлүн туһугар олохторун толук уурбут биир дойдулаахтарбыт үтүө ааттарын үйэтитиигэ, ыччаты патриотическай иитиигэ, историяны токурутууну утары үлэҕэ о.д.а. туһуланар. Ону сэргэ өйдөбүнньүктэри тутууга эбии үбү түмүү ирдэнэр.
Людмила Аммосова.