Хаҥаластар муус устар 5 күнүгэр Дьокуускайга “Арчы дьиэтэ” саха духуобунай култууратын киинигэр иккис төһүлүн киирэммит үөрүү-көтүү үктэллээх, аламай алгыс ырыалаах Хаҥалас оһуохайын тэрийэммит киэҥ түһүлгэни олохтоотубут.
Оһуохай саҕаланыан иннинэ Айыыһыты олордуу алгыһын аал уоту оттон СӨ култууратын үтүөлээх үлэһитэ Лидия Харитонова оҥордо. Бу күн бастакы Малдьаҕар нэһилиэгиттэн төрүттээх талааннаах ырыаһыт, оһуохайдьыт Ньургун Давыдов, Хачыкаат “кирпииччэлии хаамыытын” намыын кылыһахтаах куолаһынан Людмила Максимова, иккис Малдьаҕар нэһилиэгиттэн төрүттээх талааннаах оһуохайдьыппыт кэрэ куоластаах Зинаида Иванова тойуктаахтык үҥкүүлээннэр киэҥ түһүлгэни тэрийдилэр. Тиит Эбэттэн төрүттээх, олоҥхону, оһуокайы өрө туппут кэскиллээх Эрик Егоров кэлэн эрчимнээх оһуохайынан түһүлгэни киэргэттэ.
Айылҕаттан сэдэхтик бэриллэр айар дьоҕурдарын дьонноругар-сэргэлэригэр анаан хаалларбыт, улууспутугар оһуохай сайдыытыгар үлэлэспит ытык оһуохайдьыттарбытынан киэн туттарбытын, кинилэр ааттарыгар сүгүрүйэрбитин бэлиэтээн ахтан аастыбыт. Ол курдук Дархан оһуохайдьыт, алгысчыт, Россия үөрэҕэриитин туйгуна, СӨ култууратын туйгуна Егор Кампеевы, Саха сирин үтүөлээх оһуохайдьыта, Хаҥалас улууһун Аан Дархан этээччитэ, СӨ култууратын туйгуна Тимофей Давыдов – Күндүмэни, түөлбэ оһуохайын аан бастакыннан көҕүлээн үйэтиппитуонна тарҕаппыт Саха АССР култууратын үтүөлээх үлэһитэ Василиса Романованы, улуус Дархан оһуохайдьыта, үлэ, тыыл бэтэрээнэ, түөлбэ оһуохайын өрө туппут ытык киһибит Василий Харитоновы, СӨ үтүөлээх оһуохайдьыта, улуус Дархан этээччитэ, үлэ, тыыл бэтэрээнэ Евстафий Аркадьевы.
Оһуохай дьоро күнүгэр Саха Өрөспүүбүлүкэтин норуотун уонна уус—уран оҥоһуктарын маастардара Александра Охлопкова, Людмила Иванова, Светлана Мальцева, Светлана Козлова, Игнатий Константинов, Григорий Саввин, Ньургун, Чия Александровтар, Татьяна Шишигина уран үлэлэрин киэҥ көрүүгэ туруоран дьон-сэргэ сэҥээриитин ыллылар.
Өктөм нэһилиэгин олохтооҕо «Улахан алаас» хаһаайыстыба салайааччыта, СӨ үтүөлээх фермера Марк Лиханов Айыы аһын, кымыһын, кэлбит дьоннор хамаҕатык атыыластылар.
Оһуохай быыһыгар улууспут талааннаах ырыаһыттара Ньургун Александров, Александра Мордовская, Замир Горохов, Лидия Харитонова бэйэлэрин эҕэрдэ ырыаларын бэлэхтээтилэр.
СӨ оһуохай түмсүүтүн бэрэссэдээтэлин солбуйааччыта, Арассыыйа суруналыыстарын чилиэнэ Марта Николаева, Хачыкааттан төрүттээх ытык оһуохайдьыппытыгар Людмила Максимоваҕа СӨ үтүөлээх оһуохайдьыта үрдүк аатын ылбытынан өйдөбүнньүк бэлиэни туттарда.
Бу тэрээһиҥҥэ кыттыбыттарын туоһулаан ыҥырыылаах үтүө—мааны дьоннорбутун «Арчы дьиэтэ» норуот айымньытын киинин аатыттан махтал суруктарынан бэлиэтээтибит.
Сылдьыбыт дьон олус сэргэхсийэн, дуоһуйан тарҕастылар.
Мотрена Гаврильева, «Арчы дьиэтэ» норуот айымньытын киинин уус уран салайааччыта.
