Тиит Эбэ үтүө түөлбэтигэр «Айыллаан аартыктара» бөлөх истиҥ-иһирэх кэнсиэри бэлэхтээтэ. «Сарыал» Култуура киинигэр дьон-сэргэ толору мустан айылҕаттан айдарыылаах, ырыа ымыылаах Виталий Очировы, Татьяна Степанованы, Мария Романованы, Николай Васильевы ытыс тыаһынан, ыһыынан-хаһыынан көрүстэ.
Бэрт соторутааҕыта Хара нэһилиэгэр Виталий Очиров көҕүлээһининэн нэһилиэк олохтоохторо бука бары көхтөөхтүк, биир санаанан түмсэн, ким да туора турбакка “Үтүө балаҕаны” тутан үлэҕэ киллэрбиттэрин биһиги эмиэ үөрэ иһиттибит. «Саҥа балаҕан арчыланарга, ыраастанарга ананар. Оҕолору, ыччаты сахалыы тыыҥҥа үөрэтэргэ, уопсастыбаннай түмсүүлэр мусталларыгар, нэһилиэнньэ духуобунай өттүнэн сайдарыгар, сахалыы билиини-көрүүнү иҥэринэригэр, олох уйгута тупсарыгар улахан оруоллаах буолуоҕа», — диэтэ Виталий Очиров.
Биһиги Култуурабыт киинин дириэктэрэ Мария Михайлова ыалдьыттарга махтанан туран саха балаҕаныгар анаан нэһилиэкпит кинигэтин бэлэх уунна. Бу истиҥ тэрээһиҥҥэ көрөөччүлэр сахалыы сайаҕас ырыаларга уйдаран үөрэ-көтө үҥкүүлээн, кэрэ, нарын ырыалары тэҥҥэ ыллаһан, сынньанан, сэргэхсийэн тарҕастылар.
«Айыллаан аартыктара” инникитин үөрүү-көтүү үктэллэниҥ! Өрөгөйгүт үрдээтин, мичил билистин, айхал ананнын, уруй олохтоннун!
Анастасия Мордовская, Тиит Эбэ с.
