#ОҕоСаасСылыгар
Быйыл СӨ Үөрэх уонна билим министиэристибэтэ Саха сиригэр Оҕо саас сылын чэрчитинэн айымньылаахтык үлэлиир оҕо уһуйааннарын кэлэктииптэрин ортолоругар «Тыа сирин бастыҥ уһуйаана-2024» кэтэхтэн ыытыллар күрэҕи биллэрбитэ. Бастыҥ уһуйааны үс хайысханан быһаарбыттар: федеральнай үөрэх бырагырааматын олоххо киллэрии, бастыҥ коррекционнай үлэни ыытыы, саха тылын сайыннарыы.
Балаҕан ыйын 27-гэр, Иитээччи күнүгэр, кыайыылаахтар билиннилэр. Барыта 30 сайаапка 18 муниципальнай тэриллии уонна 1 куорат уокуругуттан киирбит. Балартан саамай бастыҥнарынан 10 уһуйаан таҕыстылар. Кинилэри тэҥэ М.Е. Николаев аатынан Өктөмнөөҕү билим уонна үөрэхтээһин киинин иһинэн үлэлиир «Мичээр» оҕо саада СӨ «Тыа сирин бастыҥ уһуйаана-2024» үрдүк наҕарааданы ылла.
Куонкурус сыл ахсын ыытыллар буолар, уратыта диэн, балаһыанньа быһыытынан урут кыайбыт уһуйааннар кыттыбаттар, ол курдук саҥаттан саҥа уһуйаан бэйэтин көрдөрөрүгэр ураты кыах бэриллэр.
Татьяна Владимирова.