Аҕыйах тылынан
Улахан-Ааннааҕы «Бөртө” сылгы собуотун кэлэктиибигэр 2024 сыл түмүгүн Тыа хаһаайыстыбатын күнүгэр таһаарбыппыт. Үлэ куөрдөрүүлэрэ бары хайысхаларынан куһаҕана суох. Бастыҥ ыанньыксытынан Борисова Раиса Иннокентьевна, ньирэй көрөөччүнэн Филиппов Руслан Аркадьевич ааттаммыттара.
Быйыл биһиги Тыа хаһаайыстыбатын министиэристибэтин анал бырагырааматынан түөрт саҥа дьиэни тутан үлэҕэ киллэрдибит.Бу толору хааччыллыылаах дьиэлэргэ киирбит дьоммут үөрүүлэрэ улахан. Саҥа Дьылынан үлэһиттэрбит оҕолоругар бэлэхтэри дьоммут дьиэлэринэн сылдьан түҥэтэллэр.
Түгэнинэн туһанан күндү улууспут олохтоохторун, тыа сиригэр үлэлии-хамсыы сылдьар биир идэлээхтэрбитин саҥа кэлэн иһэр 2025 сылынан эҕэрдэлээн туран уһун кыстыкпытын этэҥҥэ туораан күөххэ үктэнэрбитигэр баҕарабыт, өлгөм үүтү, элбэх төрүөҕү ыларбытыгар ыарахан үлэҕитигэр доруобай буолуҥ. Улууспутугар хороҕор муостаах, сыспай сиэллээх элбээтин, дьоммут-сэргэбит олохтоох аспытынан чэгиэн буоллуннар, эйэ-ил олохтоннун, дойду көмүскэлигэр сылдьар уолаттарбыт этэҥҥэ эргилинниннэр диэн баҕа санаабытын тириэрдэбит.
Ульяна Семенова, “Бөртө” сылгы собуотун биригэдьиир-зоотехнига.