Сурутуу-2025
Кыайыы күнүн көрсө “Бэтэрээҥҥэ суруттар” акцияҕа тэрилтэлэр, биирдиилээн дьон балай эмэ көхтөөхтүк кытыннылар.
Манна биир бастакынан Ил Түмэҥҥэ дьокутааппыт Алиш Мамедов Мохсоҕоллоохтооҕу цемент собуотуттан бэтэрээннэригэр 97 хаһыаты суруттарда. Эрдэ иһитиннэрбиппит курдук, улуустааҕы үөрэх үлэһиттэрин идэлээх сойуустарын кэмитиэтэ салайааччы Валерий Семенов өйөбүлүнэн 114 хаһыаты бастаан суруппутуттан элбэттэ, сыл иккис аҥарыгар “Хаҥаластарбытын” 130 ыал ааҕарын ситистэ. Барҕа махталбытын аныыбыт, сүрүн көмөлөһөөччүбүтүгэр! Бибилэтиэкэ, Хаҥаластааҕы киин балыыһа о.д.а. кэлэктииптэрэ төһө кыалларынан саастаах дьонноругар, Анал байыаннай дьайыы кыттыылаахтарын дьиэ кэргэттэригэр сурутууну бэлэхтээтилэр.
Төһө даҕаны үп-харчы татымын үрдүнэн, олохтоох дьаһалталарбыт сурутууга болҕомто уураллар. Олор ортолоругар бастакы кэккэҕэ уопуттаах баһылык Ирина Оболкина салайар Хачыкаат нэһилиэгэ иһэрин бэлиэтиэ этибит. 64 ыал манна хаһыаты тута олорон сонуннары билсэр буолла. Үчүгэйэ диэн нэһилиэк тэрилтэлэрэ, кыахтаах урбаанньыттар хастыы да киһиэхэ сурутууну тэрийбиттэрэ холорбурга сылдьыан сөп.
Биһиги кэккэбитигэр дьону түмэн хаһыакка сурутууну ис сүрэхтэриттэн көҕүлээччилэр эмиэ бааллара астыннарар. Ол курдук, Покровскайдааҕы “Сардаана» оҕо сайдыытын киинин буҕаалтыра, суруйааччылар сойуустарын чилиэнэ, поэт Татьяна Петрова-Мойуу Кыыһа сылын аайы бииргэ үөрэммит, 1981 сыллаах оскуоланы бүтэрбит доҕотторун кытыннаран, Мохсоҕоллоохтооҕу инбэлииттэр уонна кыаммат дьон дьиэлэригэр олорооччуларга хаһыаты бэлэхтиир идэлээхтэр, тус бэйэтэ өссө икки бэтэрээҥҥэ акциябытын өйөөн “Хаҥаласпытын” сурутан биэрдэ. Күн бүгүн икки хаһыакка 660 киһи суруттарда.
Улуу кыайыы бырааһынньыга Анал байыаннай дьайыы кэмигэр да буоллар дьоммут-сэргэбит өрө көтөҕүллүүтүнэн сир-сир аайы дьоһуннук бэлиэтэннэ. Дойдубут туһугар олохторун толук уурбут эдэркээн буойуттарбытын кэриэстээн, санаан ааспыппыт эмиэ сиэр-майгы быһыытынан буолла. Оннооҕор Покровскайга оҕолорун сэрии уотугар сүтэрбит ийэлэр барахсаттар айбыт, аны маннык иэдээн ааҥнаабатын туһугар кэриэстэбил-ырыаларын долгуйа иһиттибит… Хаһыаппыт бу 85 сыл устатыгар эһигини кытары – үөрүүлээх, хомолтолоох да күннэргэ.
“Бэтэрээҥҥэ суруттар» акциябыт салҕанар. Хаһыаппытын Дьокуускайга олорор аҕам саастаах дьоҥҥутугар даҕаны сурутан бэлэхтиэххитин син – хаһыаппыт куоракка бэчээттэнэринэн, почта индексин ыйдаххытына, ааҕааччы күнүнэн тутар кыахтанар. Чугас дьоҥҥут дойдутун сонунан билэ-көрө олороро кытары үйэтин уһатар. Онон, үтүө дьыалаҕа кыттыһыҥ, “Хаҥаласпыт” үбүлүөйдээх күнүн аны күһүн сурутуулаах көрсүөҕүҥ!
Людмила Аммосова.