Саха сириттэн бастакы бойобуой летчик Вера Захароваҕа Калининградскай уобалас Гурьевскай уокуругар Дьоруойдар аллеяларыгар мемориальнай дуоска арыллыбытын туһунан Россия телевидениетын бастакы ханаала көрдөрдө.
Мемориальнай дуоска үөрүүлээх арыллыытыгар өрөспүүбүлүкэ дэлэгээссийэтин састаабыгар киирэн Хаҥалас Мохсоҕоллооҕуттан СӨ үтүөлээх тутааччыта, үйэ аҥара үлэ ыстаастаах Виктор Ефремов баран кытынна.
Вера Кирилловна Захарова уонна Виктор Степанович төрөппүт ийэтэ Зинаида Кирилловна бииргэ төрөөбүттэр, онон ыччаттара билсэллэр. Өлүөхүмэ сиригэр Дэлгэйгэ уонна Чурапчыга Вера Захароваҕа бюстаах пааматынньык туруорбуттарын туһунан биһиги истэн турабыт. Бойобуой летчик санитарнай сөмөлүөтүнэн 200-тэн тахса бааһырбыт саллааттары госпиталларга тириэрдибитэ, төһө даҕаны концлааҕырга сылдьан ыллар, босхолонон Улуу кыайыыны байыаннай чааһыгар төннөн өстөөх уораҕайыгар Берлиҥҥэ көрсүбүтэ. Кэлин олохтон барыар диэри Эйэ фондатыгар үлэлээбит улахан общественник этэ.
Салгыы Киин телевидение сюжетын көрүҥ: https://youtu.be/hdHxjYfs5MY?si=PBmAqOF_qOo5DoWq
Людмила Аммосова.