Өктөм нэһилиэгэр дартс оонньууга турнир буолан ааста. Өктөм, Күөрдэм, Хачыкаат, Дьэр, 1-кы Малдьаҕар, Нөмүгү, Төхтүр нэһилиэктэриттэн уонна Покровскай куораттан барыта 72 киһи кэлэн кытынна.
Дартс оонньуу киһиэхэ хас даҕаны араас дьоҕуру уонна майгыны сайыннарар. Киһи сыалы чопчу табарга, илиитин хамсааһынын салайарга үөрэнэр. Маны таһынан, илии хамсааһына уонна харах көрүүтэ биир ситимҥэ үлэлииллэр. Оонньуу кэмигэр хайдах быраҕаттыыры, хайа сыалы талары, ахсааны хайдах түргэнник аҕыйатары толкуйдуохха наада. Кыайыыга дьулуһар киһи өйүн-санаатын толору түмэр, күүрүүнү тулуйарга үөрэнэр.
Күрэххэ Өктөм тутаах дьоно, урбаанньыттар күүс-көмө, өйөбүл буолан тэрээһин үрдүк таһымнаахтык ааста. Тэрийээччилэр Өктөм дьокутааттарыгар, олохтоох дьаһалтаҕа, «Барҕарыы» култуура киинин үлэһиттэригэр, Өктөмнөөҕү АСАТУ филиалыгар улахан махталларын тиэрдэллэр.
Күрэхтэһии түмүгүнэн оҕолорго I миэстэни Алексеева Лилия (Өктөм) ситистэ, II миэстэ Бочкарёв Саша (Өктөм), III миэстэ Герасимова Валерия (Төхтүр), Пахомов Михаил (Булгунньахтаах) буоллулар.
«Сектор 20» көрүҥҥэ дьахталларга Прокопьева Наталия (Күөрдэм) тэҥнээҕин булбата, II миэстэ — Платонова Надежда (Күөрдэм), III миэстэҕэ Охлопкова Оксана (Булгунньахтаах) тигистэ. Бу көрүҥҥэ эр дьоҥҥо Христофоров Валерий (Улахан Аан) бастаата, II миэстэни Михайлов Артём (Покровскай) ылла, III миэстэ Лукин Вячеслав (Покровскай) буолла.
«Улахан раунд» көрүҥҥэ дьахталларга Охлопкова Оксана (Булгунньахтаах) кыайыы өрөгөйүн биллэ, II миэстэни Артемьева Саргылана (Өктөм) ылла уонна III миэстэ Игнатьева Ирина (Хачыкаат) буолла. Бу көрүҥҥэ эр дьоҥҥо I миэстэлээх Ефремов Иван (Төхтүр), II миэстэлээх Лукин Вячеслав (Покровскай), III миэстэлээх Заморщиков Пётр (Өктөм) буолан үөрдүлэр.
Уопсай түмүгүнэн дьахталларга I миэстэҕэ Платонова Надежда (Күөрдэм) таҕыста, II миэстэҕэ Прокопьева Наталия (Күөрдэм) уонна III миэстэҕэ Охлопкова Оксана (Булгунньахтаах) тигистилэр. Эр дьоҥҥо Лукин Вячеслав (Покровскай) бастаата, II миэстэ Михайлов Артём (Покровскай) буолла, III миэстэ — Ефремов Иван (Төхтүр).
«501 көрүҥҥэ» I миэстэ — Жиркова Александра (Булгунньахтаах), Слепцов Андрей (Булгунньахтаах), II миэстэлээх — Митясова Елизавета (Өктөм), Острелин Кузьма (Нөмүгү), III миэстэҕэ — Александров Александр (Булгунньахтаах) таҕыстылар.
«Парнай» көрүҥҥэ Егорова Екатерина (Булгунньахтаах), Острелин Кузьма (Нөмүгү) I миэстэлэр, Кривошапкина Ольга (Чапаево), Никифоров Егор (Булгунньахтаах) II-тэр, Багдарыын Татьяна (Төхтүр), Слепцов Андрей (Булгунньахтаах) III миэстэлээхтэр.
Бу күрэхтэһии түмүгүнэн дартска Хаҥалас улууһугар саҥа ааттар билиннилэр. Кыайыылаахтар бары сыаналаах бирииһинэн наҕараадаланнылар. Дартс» аҥардас оонньуу буолбакка, киһи бэйэтин араас өрүттэрин сайыннарарыгар көмөлөһөр, көлүөнэлэри түмэр.
Татьяна Владимирова.