Төхтүр нэһилиэгэр сахалыы эйгэни тэрийэр, саха тылын сайыннарар, төрүт үгэһи үйэтитэр нэһилиэктэр икки ардыларынааҕы аһаҕас бэстибээл тэрилиннэ.
Тэрээһин 1917 сыллаахха саха тылын сайыннарыыга, саха норуотун култууратын историятын үөрэтиигэ, тарҕатыыга туһуламмыт «Саха аймах» култуурунай-сырдатар түмсүүнү тэрийбит Төхтүр нэһилиэгин Хахсык сириттэн төрүттээх, киэн туттар биир дойдулаахтарыгар, уопсастыбаннай, бэлитиичэскэй диэйэтэл Алексей Дмитриевич Широких аатын үйэтитиигэ ананна.
Бу бэстибээл барылын ааптарынан Төхтүр олохтооҕо Зинаида Аввакумова буолар. Сүрүн тэрийээччилэринэн Төхтүр нэһилиэгин дьаһалтата, Хаҥалас улууһун үөрэххэ салаата, А.Д.Широких аатынан Төхтүр орто оскуолата, оскуола төрөппүттэрин сүбэтэ, итини сэргэ Хаҥалас улууһун «Ийэ тыл» сүбэтэ буоллулар.
Кыттааччыларынан И.М.Яковлев аатынан Покровскай 1-кы №-дээх, А.В.Дмитриев аатынан Ой уонна А.Д. Широких аатынан Төхтүр орто оскуолаларыттан түмүллүбүт хамаандалар буоллулар. Бэстибээл 4 түһүмэҕинэн ыытылынна. Ол курдук, бастакытынан «Тыыннаах тыл – саха тыла», иккиһинэн «Төрүт саха оонньуулара», үсүһүнэн «Өбүгэ тыына» айар кут түһүмэхтэрэ уонна кэтэхтэн «Тыл тыыннааҕын тухары, норуот тыыннаах» диэн түһүмэхтэр буоллулар. Бэстибээл туһунан сиһилии «Хаҥалас» хаһыат кэлэр нүөмэригэр ааҕыҥ.
Уйбаан УЙГУУРАП,
ааптар видеоҕа устуута уонна хаартыскаҕа түһэриитэ.