СӨ ситэриилээх былааһын 2023 сыллааҕы үлэтин отчуота бүгүн Дьэр, Өктөм уонна Төхтүр нэһилиэктэрин хабан ыытыллар. Отчуоттуур бөлөҕү Бырабыыталыстыба бэрэссэдээтэлин солбуйааччыта Анатолий Семенов салайар.
Өктөмҥө отчуот үөрүүлээх түгэнтэн саҕаланна. Ол курдук манна дойду президенэ Владимир Путин көҕүлээбит «Дьиэ-уот уонна куорат эйгэтэ» национальнай бырайыагынан түөрт мэндиэмэннээх, 27 кыбартыыралаах таас дьиэ үөрүүлээх быһыыга-майгыга арылынна. Бу улууска тыа сиригэр тутуллубут бастакы элбэх кыбартыыралаах дьиэ буолар. Манна Өктөм 26 ыала хаарбах дьиэттэн көһөн, саҥа дьиэлэрин күлүүһүн туттулар.
Аныгылыы тупсаҕай оҥоһуулаах, толору хааччыллыылаах дьиэни сүрүн бэдэрээччит «АЭБ Капитал» (сал.Игорь Борисов) тэрилтэ тутта. Бу тэрилтэ манна өссө икки таас дьиэни тутан үлэҕэ киллэриэхтээх.
Саҥа дьиэҕэ киирии сиэрэ-туома алгыһынан түстэннэ.
Үөрүүлээх тэрээһиҥҥэ СӨ бырабыыталыстыбатын бэрэссэдээтэлин солбуйааччы Анатолий Семенов, улуус баһылыгын үпкэ солбуйааччыта Раида Родионова, Өктөм нэһилиэгин баһылыгын э.т. Акулина Максимова саҥа дьиэҕэ киирбит ыаллары эҕэрдэлээтилэр.
Дьон-сэргэ олорор усулуобуйатын тупсарарга туһаайыллыбыт “Хаарбах дьиэттэн дьону көһөрүү” федеральнай бырагырааманан улууспутугар үгүс үлэ ыытылларын бэлиэтиир тоҕоостоох.
2019 сылтан Покровскай куоракка биэс дьиэ бу бырагыраама иитинэн тутуллан үлэҕэ киирдэ. Бэрт сотору аны Нөмүгүгэ, Хачыкаакка, Покровскайга таас дьиэлэр олохтоохтор көһөллөрүгэр бэлэм буолуохтара.
Ольга Гермогенова.