РСФСР уонна САССР спордун маастара, СӨ норуотун хаһаайыстыбатын үтүөлээх үлэһитэ, “Гордость нации-2020” бириэмийэ лауреата, 2015-2019 сс. СӨ ыстаҥаҕа федерациятын президенэ Анатолий Добрянцев сырдык аатыгар анаммыт сахалыы национальнай ыстаныыларга III-с Өрөспүүбүлүкэтээҕи күрэх буолан ааста.
Бэс ыйын 16-17 күннэригэр “Туймаада”стадионугар 185 спортсмен, 30 хамаанда: Эр дьоҥҥо – 36, дьахталларга – 27, эр дьон (бэтэрээннэргэ) – 27, кыргыттарга – 47, уолаттарга – 48 спортсменнар кытыннылар. Бөлөхтөрүнэн арахсан кылыыга, куобахха уонна ыстаҥаҕа күөн көрүстүлэр. Күрэхтэрин бириистэрэ олус үчүгэйдэр: кыайыылаахтарга, эр дьоҥҥо уонна дьахталларга 75 тыһ. солкуобай, бэтэрээннэргэ – 45 тыһ. солк., уолаттарга итиэннэ кыргыттарга – 25 тыһ. солк., кыттааччылар бары илии тутуурдаах бардылар. Күрэхтэһиини тэрийсээччи, “Саха-спорт” ассоциациятын президенэ, РСФСР уонна САССР спордун маастара, юридическэй билим дуоктара, профессор Александр Ким-Кимэн санаатын үллэһиннэ.
Күрэхтэһии түмүгүнэн куобах, кылыы уонна ыстаҥа үс көрүҥнэрин көрдөрүүлэринэн уолаттарга уонна кыргыттарга кыайыылаахтарынан буоллулар. Максим Семенов (Мэҥэ-Хаҥалас), Маргарита Тумакова (Дьокуускай), дьахталларга Уус Майаттан Яна Бережецкая үһүс миэстэҕэ, Юна Марова (Мииринэй) иккискэ уонна Хаҥалас улууһуттан Валерия Олесова бастакы миэстэҕэ эрэллээхтик таҕыста. Валерия I-кы, II-с, III-с күрэхтэрин кыайыылааҕынан буолла. Эр дьоҥҥо үһүс миэстэҕэ Артем Пермяков Хаҥалас улууһуттан, иккис миэстэҕэ Мэҥэ Хаҥаластан Сергей Захаров уонна бастакы миэстэҕэ Горнайтан Кай Адамов буоллулар, эр дьоҥҥо бэтэрээннэргэ Өлүөхүмэттэн Евгений Ачикасов үһүс, Еремей Ильин Хаҥалас улууһуттан иккис уонна Чурапчыттан Андрей Софронов бастакы миэстэҕэ таҕыстылар.
Анатолий Анатольевич Добрянцев чаҕылхай олоҕу олорон ааспыта. Ону кини спортивнай да биографията туоһулуур өрөспүүбүлүкэ таһымнаах күрэхтэһиилэргэ хас да төгүллээх чемпиона уонна призера, чэпчэки атлетикаҕа, сахалыы ыстаныыларга, мас тардыһыытыгар.
Кини Хотугу норуотун спортивнай оонньууларын кушак тустууга абсолютнай чемпиона (Хонуу, 1989), сүгэни быраҕыыҕа иккис призера, кушак тустууга ыйааһыныгар 80 киилэ үөһэ бастыҥа, Хотугу норуот спортивнай оонньууларын мас тардыһыыга абсолютнай чемпиона (Саскылаах, 1998) этэ.
Өрөспүүбүлүкэ таһымнаах күрэхтэһиигэ “Золотая палка” мас тардыһыыга абсолютнай чемпиона (1983) уонна ЫБСЛКС (комсомол) бирииһигэр (1987), мас тардыһыытыгар Муома оройуонугар 39 төгүл, Аллараа Халымаҕа 12 төгүлүн бастаабыта. Дьокуускай куорат уонна Орджоникидзевскай оройуон 5 төгүл, араас көрүҥүн чемпиона.
Анатолий Добрянцев бастыҥ көрдөрүүлэрэ: кылыы – 42 м 27 см, ыстаҥа – 38 м 05 см, куобах – 36 м 20 см, үс көрүҥ түмүгэ – 116 м 07 см, уһунуыстаныыга – 6 м 63 см, сүүрүүгэ 100 м – 11,5 сөк, 200 м – 24,0 сөк, 400 м – 53 сөк.
Анатолий кыратыгар аҕалара эрдэ өлөн, элбэх оҕолоох ыал улахан оҕото буолан, балтыларын, бырааттарын бэйэтэ көрөн-истэн, хара үлэҕэ, хотон үлэтигэр эриллэн, тыа сиригэр кыһалҕаны, кыратыттан билэ улааппыта үлэһит быһыытынан уһаарыллан тахсыытыгар улахан төһүү буолбута. А.А. Добрянцев аатын үйэтитии — биһиги ытык иэспит.
Василий МОЖУКОВ, СӨ спордун бэтэрээнэ, Покровскай к.