«Эргистэри» үлэ сомоҕолуур

Саха сиригэр «Бөртө» сылгы собуота, “НХЗ-групп”, Нөмүгү «Туймаада» эко-ферма о.д.а. бөдөҥ тыа хаһаайыстыбатын тэрилтэлэрэ биллэр-көстөр. Ол эрээри, атын дьоҕус хоһуун, туруу үлэһит дьонноох кэлэктииптэр эмиэ бааллар.

Хаҥаласка Бэстээх нэһилиэгэр «Эргистэр» тыа хаһаайыстыбатын кээпэрэтиибэ олорго киирсэр. Сылгы иитиитинэн дьарыктанар хаһаайыстыбатын туһунан салайааччы Ирина Владимирова сырдатар:

— Биһиги, «эргистэр», 2011 сыл атырдьах ыйыгар тэриллибиппит. Мин 2015 сыллаахтан бу потребительскай кээпэрэтиип дириэктэринэн, 2020 сылтан бэрэссэдээтэлинэн үлэлиибин. Бэстээх, Чараҥ, Ой, Покровскай олохтоохторо паайбытын холбоон тэрийбиппит. Бары көмө хаһаайыстыбалаахпыт. Сүнньүнэн аймахтыы Владимировтар киирэллэр, — кэпсиир Ирина Михайловна, — Бастаан үс биэттэн саҕалаабыппыт, билигин 155 сылгылаахпыт, мантан 132-тэ биэ, 17 атыыр уонна сэттэ ыччат сылгы. Үс көлүнэр аттаахпыт. Сылгыбыт базата нэһилиэк Арҕаа Сайылыгар баар. 2017 сыллаахха Тыа хаһаайыстыбатын министиэристибэтиттэн 1 мөл. солкуобайдаах Граны ылбыппыт. Базабытыгар икки дьиэлээхпит, гараас, баанньык, күрүө-хаһаа туттубуппут. Бастайааннай икки үлэһиттээхпит – Бэстээхтэн сылгыһыт Алексей Юрьевич Соловьев, тырахтарыыс Сергей Васильевич Васильев. Бэркэ үлэлииллэр. Кинилэри сэргэ паайдаахтар эмиэ үлэҕэ эриллэллэр. Сылгыһыппыт сирин-уотун, сылгыларын үөрдэрин көрөр-истэр. Кыһын, саас өрөбүллэргэ бары паайдаахтар тахсан көрсөллөр, эбии аһаталлар. Хаһаайыстыбабыт түөрт тыраахтардаах. Техника көмөтүнэн оттуубут, илии үлэтэ суох. Окко аймахтарбыт көмөлөһөллөр, хас биирдиилэрэ аттаахтар, күһүн биирдии убаһа идэһэлэнэбит, — диир кини.

От үлэтэ күүһү түмүүнү ирдиир

Паайдаахтар бары кытталлар. Афанасий Владимиров, Ил Түмэн бэрэссэдээтэлин солб., эмиэ, сэмэйдик «от охсобут…» диэтэ. Сааһаабыт үрэҕин аттыгар оттууллар эбит.

Былырыын кооператив 116 туонна оту оттообут. Быйыл ходуһа үүнүүтэ мөлтөһүөр – 90-100 туоннаны булунарга сорук турар. «Эбии от атыылаһааччыбыт. Сылгыларбытыгар хайаан да эбиэс биэрэбит, өрөбүл күннэргэ уолум Михаил эбэтэр кэргэним Афанасий Семенович», доҕотторбут көмөҕө кэлээччилэр”, — кэпсиир Ирина Михайловна,.

Урууну-аймаҕы үлэ түмэр

Бииргэ үлэ аймах дьону сомоҕолуур. Афанасий Владимиров тэрийбит кээпэрэтиибэ сүнньүнэн итиннэ тирэнэр. Кини саҥа тэриллии саҕана биэ бэлэхтэлээбитин ахталлар. Билигин 70-80 ыал сибиэһэй этинэн хааччыллар кыахтанна. Үлэнэн ыччаттары иитии бу маннык умнуллубат күннэртэн саҕыллара хайҕаллаах дьыала. Үлэ диэни аҕа көлүөнэлэриттэн билэн улааппыт «эргистэр» ол иһин тэнийэн, өй-санаа өттүнэн бигэ тирэхтээхтэр, хара үлэ диэни билэн билиигэ-көрүүгэ дьулуурдаахтар, сайдаллар.

Кирилл Черепанов.