Аҕа дойдуну көмүскээччилэр күннэрин көрсө
Аҕа дойдуну көмүскээччилэр күннэрин көрсө Покровскайга “Саргы түһүлгэтэ” култуура киинигэр Наследники Победы диэн ырыаҕа, үҥкүүгэ, уус-уран тылга аһаҕас куонкурус буолла. Манна 426 киһи кытынна — оҕолор, улахан дьон, үс жанрга саастарынан арахсан.
Сарсыардаттан оҕо уһуйааннарыттан кырачааннар кэлэн үҥкүүлээн тэйдилэр, бииртэн биир сонун айымньылары көрөөччү болҕомтотугар таһаардылар. Нүөмэрдэр Кыайыыны уһансыбыттарга ананнылар, Ийэ дойдуга тапталы туойдулар — култуура киинэ күнү быһа оргуйан олордо…
Барытын кыайан көрбөтөх киһи буолан, күрэс түмүгүн быһаччы үлэлэспит дьонтон ыйыталаһа кэлбиппэр култуурам үлэһиттэрэ үөрэ көрүстүлэр.
— Элбэх киһи кыттыбытыттан бары да үөрдүбүт, астынныбыт, — диэтилэр Светлана Ударина, Андриан Егоров, Светослава Неустроева уонна да атыттар, буолан ааспыт тэрээһиннэрин түмүгүн ырыта олорор дьон. – Былырыын Кыайыы 80 сылынан курэспит Хаҥалас олохтоохторугар ыытыллыбыта, тиэмэтэ биир этэ – Кыайыыны аҕалбыттарга махталга. Быйыл кэҥэтэн биэрдибит, Ийэ дойдуга тапталы иитиигэ эбии туһулаан уонна аһаҕас күрэс диэн биллэрбиппит. Онон Дьокуускай куораттан, Жатайтан, Намтан, Бүлүүттэн тиийэ кэлэн үөртүлэр. Киһи кэрэхсиэҕэ диэн куонкуруска 17 Анал байыаннай дьайыы кыттыылаахтарын дьиэ кэргэттэрэ кытыннылар, маладьыастар! Жанрдарынан Мохсоҕоллоохтооҕу оҕо искусствотын оскуолатын концертмейтера, теоретическай уонна хоровой дьиссипилиинэлэргэ, фортепьянога преподавателэ Елена Маркова бэрэссэдээтэллээх нүөмэрдэри сыаналыыр сүбэҕэ онон Анал байыаннай дьайыы бэтэрээнэ, “За отвагу”, “За взятие Бахмута” мэтээл кавалера, элбэх оҕолоох дьиэ кэргэн аҕа баһылыга Андрей Афанасьев үлэлэстэ. Ону сэргэ –СӨ ыччат политикатыгар туйгуна, АБДь Хаҥаластааҕы штабын координатора, общественноһы кытары сибээскэ исписэлиис Виктория Устинова, култуура туйгуна, “Өлүөнэ долгуннара” литературнай кулууп салайааччыта Людмила Колесова, «Күн арылы” үҥкүү устуудьуйа салайааччыта, Эбии үөрэхтээһин киинин, ыччат “Движ” диэн кэлэктиибин салайар Светлана Симерова, үөрэхтээһин туйгуна, Саха сирин биир бастакы драматурдарын Прокопий Тимофеев сиэнэ Надежда Ахменова сыаналаатылар. Биэс саастаах кырачааннартан саҕалаан сааһырбыт дьоҥҥо тиийэ 96 нүөмэри көрдүбүт, иһиттибит. Дьон талааннаах да буолар эбиттэр! Истиэххэ үчүгэй.
Жанрдарынан арааран көрдөххө, түмүк да астык буолла
Вокалга ол курдук, 5-7 саастаах кырачааннарга («Сардаана”, “Сказка”, “Ромашка” уһуйааннар оҕолоро араас көрүҥҥэ кытыннылар) Дьокуускайтан Ева Егорова бастакы истиэпэннээх лауреат буолла. Иккис – “Маленькие звезды”ансаамбыл Дьокуускайтан, үһүс — Улахан Аантан “Ымыычаан”, дипломаннарынан туһааннааҕынан Покровскайтан Ира Мартынова, Дьокуускайтан Диана Поскачина, Арина Латышева. 8-12 саастаахтарга лауреаттарынан ааттаннылар Дьокуускайтан Эрхан Баишев, Покровскайтан Данил Ударин, Ойтон Арчылаан Кондратьев, 13-17-лээхтэргэ – Нам Тумулуттан Дьулурхан Харитонов, Хаҥалас Тумулуттан Марфа Соловьева, Улахан Ааныттан Никита Тапыев. Волкалга үчүгэйдик кытыннылар Покровскайтан “Гармония”, “Звуки струн”, Бэстээхтэн “Мелодия”ансаамбыллар.
Онтон вокалга улахан дьоҥҥо түмүк үс бөлөҕүнэнтаҕыста – Покровскайтан Сандра Матвеева, Лариса Филиппова, Валерий Федоров бастакы истиэпэннээх лауреаттарынан буоллулар (ситиһиилэммиттэри, бырастыы гыныҥ, элбэхтэрэ бэрдинэн барыларын ааттаабаппын, “Саргы түһүлгэтэ” Култуура киинин сайтыгар көрөөрүҥ), олус да иэйиилээх ырыалары астына иһиттибит.Сыаналыырга “булкаас категория” диэн эмиэ баар буолла –араас саастаахтар – “Этюд” ансаамбыл, “Свои” бөлөх, “Элегия” эстраднай устуудьуйа, ону сэргэ Замир уонна Арылхан дуэттэрын толоруулара көрөөччү болҕомтотун тартылар.
Биһиги дьоммут ырыаны таптыыллар! Хуордар кытыннылар, патриотическай ырыаларынан – Покровскай куорат, маннааҕы искусство оскуолатын хуордара, оннооҕор 3-с оскуола 3-с “а”,”б” кылааастарын “вольнай” дэнэр ырыа ансаамбыллара – салайааччыларга махтал буоллун!Саамай чаҕылхай толорооччунан киэн туттар Лариса Филипповабыт буолла. Онтон “Бастыҥ салайааччы” диэн ааты Дьокуускайтан Пелагея Баишева ылыан ылла.
Хореография көрүҥэр кырачааннарга Мохсоҕоллоохтон “Капелька”, Покровскайтан “Сир симэхтэрэ” бөлөхтөр лауреаттаатылар, “Сардаана” оҕо уһуйаанын “Солнечные лучики” бөлөҕө дипломант буолла. Обургу оҕолорго Покровскай 3-с нүөмэрдээх оскуолатын “Ритмикатын”, талааннаах 3-с “а” уонна “б”кылаастарын үөрэнээччилэрэ ситиһиилэннилэр.
50-тан үөһээ саастаах дьоммут да хаалсыбатылар – Өктөмтөн “Сардаана”, Покровскайтан, биллэн турар, “Гармония” лауреаттарынан, онтон муҥутуур кыайыылааҕынан Мохсоҕоллоохтон “Капелька” былааһы ыллылар. «Бастыҥ салайааччынан” бу бөһүөлэктэн Алена Павлова ааттаныан ааттанна. Куонкуруска кыттааччыларбыт Ийэ дойду көмүскэлигэр олохторун толук уурбут хас да көлүөнэ буойуттарбытыгар “Туруйаларынан” өйдөбүнньүк дьүһүйүүттэн саҕалаан аныгы тэтимнээх үҥкүүлэргэ тиийэ бэлэхтээтилэр.
Уус-уран тылга күрэс долгутуулаахтык ааста – биирдиилээн, бөлөҕүнэн ааҕыы буолла. Киһи кутун-сүрүн тутар тыллар иһилиннилэр, ардыгар сылаас иэйии, ардыгар курус тыын илгийэн аастылар… Кырачааннарбытыгар Покровскайтан Настя Мингалиева, Кирилл Павлов лауреат аатын ылан астыннылар. Обургу оҕолорго Бэстээхтэн Екатерина Павлова, Ойтон 3-с оскуола үһүс кылаас оҕолоро, Покровскайтан “Детки” удстуудьуйа лауреаттарынан буоллулар, Бэстээхтэн Кирилл Наумов, Кирилл Делец, Дмитрий Федоров, Роберт Диляверов, Хачыкааттан Влада Павлова дипломант аатын ыллылар. Онтон улахан дьоҥҥо Жатайтан Маргарита Барановская, Покровскайтан хоһоон суруйар Наталья Добрянцевабыт лауреаттарынан буоллулар, Кыһыл Үрүйэттэн кэлбит “Ручеек” бөлөх муҥутуур кыайыылаах ааты иҥэринэн дойдутугар төнүннэ. Бэстээхтэн уран-тылга үгүс ыччаты үһүйар Елена Сергеева “Бастыҥ салайааччы” дьоһун ааты ылла.
“Наследники Победы” 426 киһи кыттыылаах патриотическай тыыннаах күрэһи тэрийэн ыыппыт “Саргы түһүлгэтэ” култуурабыт киинин,ону сэргэ көх-нэм буолан түбүктэрин тэҥҥэ үллэстибит “Защитники Отечества”судаарыстыбаннай өйөбүл пуондатын салаатыгар махтал буоллун — Аҕа дойдуну көмүскээччилэр күннэрин көрсө үтүөкэн бырааһынньыгы бэлэхтээтилэр! Искусство кыайыыга кынаттыыр.
Людмила Аммосова, хаартыскалары култуура киинэ тиксэрдэ.
