Бэлиэ түгэн
Прогрессивнай өйдөөх-санаалаах атыыһыт, меценат Семен Петрович Барашков төрөөбүтэ 150 сылынан ыытыллар тэрээһиннэр чэрчилэринэн Хачыкаакка аһаҕас халлаан анныгар Түмэл-уһаайба арыллыыта олохтоохтору түмтэ.
Үөрүүлээх күнүнэн мустубут дьону нэһилиэк баһылыгын солбуйааччы Сардаана Ефимова эҕэрдэлээн туран бу Олохтоох көҕүлээһини өйүүр тосхолунан олоххо киирбит бырайыак туһунан сиһилии билиһиннэрдэ. Бибилэтиэкэр Айталина Ефремова быйыл сайын “ТаасУусФест» фестиваль кэмигэр бетонунан оҥоһуллубут скульптураларын сырдатта.
Биһиги Хачыкааппыт былыр-былыргыттан баай историялаах нэһилиэгинэн биллэр. Олохтоох дьаһалтабыт быйыл Хачыкааттан киэн туттар киһибит, улахан атыыһыт, меценат Семен Барашков үбүлүөйдээх сылынан үгүс тэрээһини ыытан улууспут эрэ буолбакка өрөспүүбүлүкэ дьонун-сэргэтин болҕомтотун тарта. Бу барыта кэлэр көлүөнэлэр, эдэр ыччаппыт олорон ааспыт историябытын дириҥэтэн үөрэтэригэр, араас экспедициялары ыытарыгар интэриэһи тардыаҕа, төһүү күүс буолуоҕа.
Саҥа тэриллибит С.П.Барашков аатынан Түмэл-уһаайба күрүөлэнэн, былыргылыы истиилинэн саҥа тутуллубут киирэр ааннанан дьоһун көрүҥнэннэ. Манна сайын айар талааннаахтар санааларын ууран туппут дириҥ ис хоһоонноох бетон оҥоһуктара, ону сэргэ урукку сылларга сопхуоспут хонтуората буолан турбут Бааһай диэн кыахтаах киһи олорбут, манна Сэмэн Барашковтыын суруйааччы Алексей Кулаковскай элбэхтик көрсүспүт дьиэлэрэ эмиэ киирдэ. Кэлин бу бырайыакпыт эбии ситэриллэн-хоторуллан дьоҥҥо-сэргэҕэ нэһилиэкпит историятыттан элбэҕи кэпсиир, Хачыкааппытыгар киэн туттар кэрэ көстүүлээх бэлиэ сир буоларыгар эрэллээхпит.
Саҥа Түмэл-уһаайба үөрүүлээх арыллыытын олохтоох дьаһалта, «Сарыал” култуура киинин уонна бибилэтиэкэ үлэһиттэрэ олус бэркэ тэрийэн ыыттылар.
Зинаида Лазарева, үлэ бэтэрээнэ, “Хаҥалас” хаһыат общ. корр. Хаартыскалар ааптартан уонна олохтоох дьаһалтаттан.
