Аныгы үйэҕэ уот-күөс боппуруоһа олус уустуга суох буолуо дии санаабытым да, Бэстээх нэһилиэгэр баччаҕа диэри «уотпут хаһан кэлэр» дэһэллэр эбит.
Эрэдээксийэҕэ, Бэстээхтэн олохтоох дьокутаат, Татьяна Ходжава тахса сырытта:
— Биһиги нэһилиэкпитигэр номнуо 20-чэ сыл тухары, сотору-сотору өрөмүөн үлэлэринэн сибээстээн, уота суох күнү быһа олоробут. Бу тухары туох да тэрилтэ үлэлээбэт. Мин, холобур, маҕаһыынҥа атыыһыттыыбын. Бородуукта бөҕө буорту буолар. Бүтүн улахан тоҥорор тэриллэр ууллуохтарыгар диэри уотпут кэлбэт. Барыта ночоот! Сберкасса, почта, дьаһалта, балыыһа — туох да үлэлээбэт… Маннык уһуннук уоту араарыы сайын эрэ буолбакка, кыһын эмиэ буолар. Ити кэмҥэ оннооҕор оҕо уһуйаана уонна оскуола кытары үлэтэ тохтуур. Ол тухары, сибээспит аны быста илигинэ, бары Покровскай куоракка баран дьыалабытын ситиһэбит. Эбиэт кэннэ сибээспит кытары сүтэр. Бу айылаах сайдыы кэмигэр хайдах уота-күөһэ суох олоруохха сөбүй?
Бу боппуруос сүрүн эппиэтэ саппаас уот ситимигэр холбонууга сытар. Олохтоохтор онно-манна туруорсаллар эбит да, харда суох. Дьиҥэр саппаас ситимҥэ диэри 3 км. уоту тардан биэрдэхтэринэ барыта табыллар дьыала, бөһүөлэк быстыбат уоттанар.
Бу күннэргэ Бэстээх нэһилиэгин дьаһалтатыгар эрийэ сатаатыбыт да, төлөппүөннэрин ылбаттар, арааһа, уота суохтар быһылаах. Маннык арахсыылары былаан быһыытынан ыам ыйыттан саҕалаан атырдьах ыйыгар тиийэ, сарсыарда 9 чаастан киэһэ 7 чааска диэри салҕаналлар.
Тустаах дьаһалы ылыныы дьа-һалта өттүттэн баар буолуохтаах.
Татьяна ВЛАДИМИРОВА.