Хаһыат суруналыыстарын бөлөҕө Тиит Арыы нэһилиэгэр үлэни-хамнаһы, сурутуу хаамыытын билсэ сырыттыбыт. Тыа дьоно бэркэ дьаһанан олороллорун көрөн кэллибит.
Кыдьымах быыһынан Чкалов сэлиэнньэтигэр сырыттыбыт. Дьон-сэргэ кэминэн кыстыкка киирбитин көрдүбүт. Социальнай эбийиэктэр кыах баарынан сылааска холбонон үлэлии олороллор. Кыра кэмпилиэктээх оскуолаҕа, оҕо уһуйааныгар, култуура-спорт комплексыгар үлэ барар, тэрээһин үгүс – Бастакы Президеммитигэр аналлаах декадаҕа кыттыбыттар.
Бу күннэргэ идэһэлэнии түбүгэ, муус хаһааныыта. Дьон үгэһинэн кыаҕа баарынан сүөһү-ас тутан олорор. Арай ыал барыта киинтэн сылааска холбонуута толору кыалла илигэ долгутар, эмиэ – арыы сиргэ оттук маһынан хааччыныы, уматык сыаната үрдээн кыһалҕа өссө да баар.
Тиит Арыыга бэйэтигэр эмиэ бу боппуруос ситэ быһаарылла илик. Үлэ барар, сыал-сорук туруоруллан турар. Ол туһунан сыыйа кэпсиэхпит. Култуура дьиэтин эдэркээн үлэһиттэрэ уус-уран самодеятельность кыттыылаахтарын кытары үбүлүөйдээх бэлиэ күннэригэр бэлэмнэнии чэрчитинэн соҕурууҥҥу нэһилиэктэргэ кэнсиэр, үлэ уопута кэһиилээх гастролга турунан эрэллэр. Онтон саастаах дьиэ хаһаайкалара, амарах сүрэхтээх далбар-хоттуттарбыт интэринээт дьиэтигэр кииннэнэн анал байыаннай дьайыыга сылдьар уолаттарбытыгар көмө буолан харыстанар сиэккэ баайан, оҕуруот аһын хатаран «кураанах миин» бэлэмниир түбүккэ сылдьаллар.
Тиит Арыыга олох сэргэх. Хаһыакка сурутууга көхтөөхтүк ылсан эрэллэрэ үөрдэр. Пресс-кииннэммиттэр. Онон сотору кэминэн сонуннары истиэхпит, билиэхпит. Биһиги эмиэ тэттик суруйууларбытын таһаарыахпыт. «Умнас» суола арҕаа хайа үрдүнэн тардыллыбыта олоҕу киин сири кытары сылы эргиччи ситимниирэ олоххо көмөлөөҕө биллэр.
Махтал, улууспут дьаһалтатыгар массыына анаан биир күн көҥүллүк сылдьан нэһилиэк олоҕун билсэн кэлэрбитигэр кыах биэрбитигэр, уонна олохтоох дьаһалтаҕа, ыалдьытымсах тиит-арыыларга.
Людмила Аммосова.