Мас тардыһыы көрүҥэр Чурапчыга Күүстээх Дэһээккин сырдык кэриэһигэр уонна Дьокуускай куоракка ыытыллыбыт күрэхтэһиилэргэ улууспут күүстээх мадьынылара бэркэ күрэхтэспиттэрэ. 29 ыйааһынтан биһиэннэрэ 27 путевканы ылбыттара.
Талба Таатта сиригэр Ытык Күөлгэ ыытылла турар XXII-с Манчаары оонньууларыгар Хаҥалас мадьынылара, уолаттарга 80 кг үөһэ – Сергей Исаков, бэтэрээн эр дьоҥҥо 75 кг – Александр Брызгаев, дьахталларга 60 кг – Александра Нарахаева, 65 кг – Марина Федоренко чөмпүйүөн буоллулар. Үрүҥ көмүс мэтээл хаһаайыннарынан бэтэрээн эр дьоҥҥо 85 кг — Ньургун Уваров, дьахталларга 55 кг – Валентина Суханова ааттаннылар.
Ыйааһыннарыгар үһүс буоллулар уонна боруонса мэтээли кэттилэр бэтэрээн эр дьоҥҥо 65 кг Дмитрий Березкин, дьахталларга 50 кг Наталья Радченко уонна 85 кг үөһэ Олеся Петрова кытаанах киирсиилэри ааһан, ситиһиилээхтик кыттан биир дойдулаахтарын хаҥаластары олус үөртүлэр.
Манна улууспут мас тардыһааччыларын федерациятын салайар, сүрүннүүр, Саха сирин мас-рестлиҥҥэ Федерациятын Бастакы вице-президенэ Игорь Борисов үлэтин сыаналыыр, бэлиэтиир наадалаах.
Уйбаан УЙГУУРАП.