Бастакы кылааска биһигини төрөппүттэрбит Покровскайдааҕы оҕо ускуустубатын оскуолатыгар үҥкүүгэ биэрбиттэрэ. Онтон бэһис кылааска үөрэнэ сырыттахпытына Наталья Михайловна Кузьмина “Ханаласчаан” үҥкүү ансаамбылыгар ыҥырбыта. Бу үҥкүү бөлөҕөр, саҥа кэлэктиипкэ киирэн баран, атын оҕолору кытта билсиспиппит, араас үҥкүүлэри үөрэппиппит. Холобура, “Бэһиэлэй бэтиэхэ”, “Дьөһөгөй”, “Айанньыттар”, “Кыталыктар”, саха уонна араас омук үҥкүүлэрин. Үҥкүү биһиэхэ олус туһалаах: эт-хаан өттүнэн сайдабыт, араас сирдэринэн, куораттарынан сылдьан элбэҕи билэбит, көрөбүт, сайдабыт, бириэмэбитин сөптөөхтүк туһанабыт.
Биһиги оскуолабытыгар “Ханаласчаан” үҥкүү ансаамбыла 1995 сыллаахха дириэктэрбит Спиридон Спиридонович Шишигин көҕүлээһининэн уонна хореограф Наталья Михайловна Кузьмина салалтатынан тэриллибитэ. 2004 сыллаахха ансаамбылбыт элбэх ситиһиилэринэн образцовай диэн буолбуппут. Биһиги элбэхтик дьарыктанабыт, араас кэнсиэртэргэ, күрэхтэргэ кыттабыт. 2024 сыллаахха сайын “Азия оҕолоро” норуоттар икки ардыларынааҕы VIII спортивнай оонньуулар култуурунай бырагырааматыгар кыттыбыппыт олохпутугар биир чаҕылхай умнуллубат түгэн буолар.
Соторутааҕыта ансаамбылбыт тэриллибитэ 30 сыллаах үбүлүөйэ буолан ааста. “Саргы Түһүлгэтигэр” ыытыллыбыт бырааһынньыктааҕы кэнсиэргэ араас сылларга үҥкүүлээбит выпускниктар кэлэн кытыннылар. Ийэлэрбит эмиэ үҥкүү бэлэхтээтилэр, кинилэр сыанаҕа тахсан үҥкүүлээбиттэрэ олус долгутуулаах, үөрүүлээх этэ. Кэнсиэрбит олус сэргэхтик, өрө көтөҕүүлээхтик ааста. Көрөөччүлэр хас биирдии үҥкүүнү олус истиҥник, ытыс тыаһынан көрүстүлэр. Кыттааччылар бары биир санаанан, күүстээхтик дьарыктанан кэнсиэрпит түмүгэ үчүгэй буолла.
Наталья Михайловнаҕа биһигини үҥкүү кэрэ эйгэтигэр киллэрбитигэр, умсугутутан уһуйбутугар олус махтанабыт. Биһиэхэ өрүүтүн күүс-көмө, өйөбүл буолалларыгар ийэлэрбитигэр эмиэ махталбытын тиэрдэбит. Уһуйааччыбытын Наталья Михайловнаны, бары үҥкүү дьарыктаах оҕолору “Хаҥаласчаан” ансаамбылбыт 30 сылын туолбутунан эҕэрдэлиибит! Баҕарабыт инникитин ансаамбылбыт үүнэ-сайда турарыгар, элбэх ситиһиилэри уонна чэгиэн доруобуйаны.
Сайаана Соловьева, Кэрэчээнэ Кривошапкина, И.М. Яковлев аатынан Покровскай 1 №-дээх орто оскуолатын 8 кылааһын үөрэнээччилэрэ, суруналыыстара.