Өктөмҥө Билим дьоҕус академиятын киэҥ уораҕайыгар Саха сирин Бастакы бэрэсидьиэнэ Михаил Николаев сырдык аатыгар анаммыт «Кэскили түстүүр идиэйэлэр» III Николаевскай форум түмүктүүр тэрээһинэ буолла. Форум сүрүн сыаннаһа – көхтөөх уонна идэлэригэр бэлэмнээх ыччаттары түмэр.
Сахабыт сирэ сайдарыгар дьиҥ быһаарыылары ылынарга дьоһуннаах этиилэри, барыллары оҥорор саҥа көлүөнэ үс күннээх үлэлэрин түмүктээн көмүскээтилэр. Кинилэри киэҥ билиилээх эдэр экспердэр: Форум дириэктэрэ, Ил Түмэн иһинэн Ыччат парламенын бэрэссэдээтэлэ Антон Васильев, Туризм сайдыытыгар территориальнай маркетинг агенствотын генеральнай дириэктэрин эбээһинэһин толорооччу Александра Ефимова, СӨ Нэһилиэнньэ дьарыктаах буолуутугар киинин дириэктэрин солбуйааччы Айтал Керемясов уонна РФ Ыччакка граннарын исписэлииһэ Полина Агафонова сыаналаатылар.
Быйылгы форум сүрүн тиэмэтинэн урбаан уонна тыа хаһаайыстыбатын сайдыытыгар үбүлээһини киллэриигэ муниципалитеттар экэниэмикэлэрин бөҕөргөтүүгэ аналлаах бырайыактары оҥорон таһаарыы буолла. Бу ыччаттар бырайыактара улуустар сайдыыларыгар олус дьоһуннаах үлэлэр. Биллэрин курдук чуолаан нэһилиэктэргэ, ыраах улуустарга Өрөспүүбүлүкэбит инникитэ чочуллар. Кыттааччылар Форум бырагырааматыгар баар практическай сессияларга кыттан, билиилэрэ-көрүүлэрэ кэҥээн саҥа идиэйэлэри толкуйдаан оҥорбут бырайыактара, бэйэлэрин улуустарыгар олоххо киллэрэллэригэр төһүү күүһүнэн буолуоҕа.
3- с төгүлүн ыытыллыбыт Николаевскай форум өрөспүүбүлүкэбит брендин быһыытынан биллэр. Кыттааччылар этиилэрэ, идиэйэлэрэ, бырайыактара – эрэгийиэн социальнай-экэнэмиичэскэй сайдыытын стратегиятыгар көстүөҕэ. Үгүс кыттааччылар үлэ салааларынан каадыр резервэтигэр бэлиэр бааллар уонна эрэгийиэммит сайдыытыгар бэйэлэрин кылааттарын киллэрэ сылдьаллар.
Уйбаан УЙГУУРАП, ааптар видеоҕа устуута уонна хаартыскаҕа түһэриитэ: https://t.me/gazetahangalas/44097
III Николаевскай форум түмүктэннэ
